Aqmola oblysyna esirtki saýdasymen aınalysqandar 11 jáne 13 jylǵa sottaldy

KÓKShETAÝ. QazAqparat – Aqmola oblysy aýmaǵynda geroın esirtkisin satýmen aınalysqan Shortandy aýdanynyń 37 jastaǵy turǵyny jáne 58 jastaǵy astanalyq áıel sottaldy. Nur-Sultan qalasynyń qylmystyq ister jónindegi mamandandyrylǵan aýdanaralyq soty aıyptalýshylarǵa qatysty úkim shyǵardy, dep habarlaıdy QazAqparat tilshisi.

Aqmola oblystyq PD baspasóz qyzmetiniń málimetinshe, esirtki qylmysyna qarsy is-qımyl basqarmasynyń qyzmetkerlerine Nur-Sultan qalasy men Shortandy aýdanynyń turǵyndary óńirge geroın jetkizýmen aınalysyp júrgendigi týraly aqparat túsken. Jedel izdestirý is-sharalary barysynda aqparat rastalady.

Kúdiktilerdi tintý kezinde astanalyq áıeldiń ish kıiminen 595 g geroın tabylyp, tárkilendi. Al, úıin tintý kezinde 200 myń teńgeden astam aqsha, elektrondyq tarazylar, sarǵysh tústi suıyqtyǵy bar ınektsııalyq shprıts jáne 845 g geroın salynǵan polıetılen paket tabyldy. Barlyǵy 1440 g geroın zańsyz aınalymnan alyndy, bul - geroınniń 5000-nan astam bir rettik dozasy.

«Qylmystyq kodekstiń 297-baby 3-bóligi «ótkizý maqsatynda adamdar tobynyń aldyn ala sóz baılasýy boıynsha jasalǵan asa iri mólsherdegi esirtki zattaryn zańsyz satyp alý, saqtaý, tasymaldaý» sanktsııasyna sáıkes múlkin tárkileı otyryp, 10 jyldan 15 jylǵa deıin bas bostandyǵynan aıyrý jazasy qarastyrylǵan. Sot úkimimen kúdiktiler 13 jáne 11 jylǵa bas bostandyǵynan aıyryldy», - dedi Aqmola oblysy PD esirtki qylmysyna qarsy is-qımyl basqarmasynyń bastyǵy, polıtsııa polkovnıgi Meıram Japbasov.

Aıta ketsek, Stepnogor qalasynda ıisshil ıttiń kómegimen úıge jasyrylǵan esirtki tabylǵan bolatyn.