Aqmola oblysyna 35 myń Pfizer vaktsınasy jetkizildi

KÓKShETAÝ. QazAqparat - Aqmola oblysynyń dári-dármek qoımasy 35 100 dana Pfizer vaktsınamen tolyqty, dep habarlaıdy QazAqparat tilshisi oblystyq densaýlyq saqtaý basqarmasynyń baspasóz qyzmetine silteme jasap.

Vedomstvonyń málimetinshe, vaktsına Aqmola oblysyndaǵy -80-90 gradýs temperatýra aralyǵynda jumys isteıtin 2 tońazytqysh kamerasyna ornalastyryldy. Odan bólek, 1 dana avtorefrejıtor jańadan satyp alyndy. Qurylǵy mınýs jáne plıýs kez-kelgen temperatýrada qalypty jumys isteıdi.

«Aldaǵy dúısenbiden bastap vaktsına ózge aımaqtarǵa tasymaldanatyn bolady. Atalǵan vaktsınamen, eń aldymen balalar, 12-17 jas aralyǵyndaǵy jasóspirimder men júkti áıelderge (16-37 aptadaǵy júktilik merzimindegi aıaǵy aýyr kelinshekterge), bosanǵanyna 42 kún tolǵan bala emizetin analarǵa salynatyn bolady», - dedi vedomstvodan.

Qazirgi tańda Aqmola oblysy aýdandyq aýrýhanalar ekpe maýsymyna daıyn.

«Medıtsınalyq uıymdar, mektepter, medıtsınalyq qyzmetkerler arnaıy ádistemelik daıarlyqtan ótip, tolyq attestatsııalandy. Ekpe egý jumystaryna ruqsat aldy. Dál osy sátte ata-analardyń kelisimin alý úshin aqparattandyrý júrgizilip jatyr. Aýdandarda túsindirme jumystary qarqyndy júrýde. Oǵan jaýapty arnaıy mamandar bekitildi. Ekpe egetin brıgadalar jumysqa kirisýge ázir», - dep tolyqtyrdy vedomstvodan.