Aqmola oblysyna 120 mlrd teńgeden astam ınvestıtsııa tartyldy

KÓKShETAÝ. QazAqparat - Aqmola oblysynda 120 mlrd teńgeden astam shetel ınvestıtsııasyna 10 joba júzege asyrylýda, dep habarlaıdy QazAqparat tilshisi oblystyq kásipkerlik jáne ónerkásip basqarmasynyń baspasóz qyzmetine silteme jasap.

Vedomstvonyń málimetinshe, Aqmola oblysyna tartylatyn ınvestıtsııa kólemi jyldn jylǵa artyp keledi.

«Sheteldik ınvestorlardyń qarjysy arqyly aldyńǵy qatarly tehnologııany meńgerý, ekonomıkany belsendendirý, jumyspen qamtý deńgeıin kóterý, qazirgi zamańǵy naryqtyq ınfraqurylymdy qalyptastyrý jáne óńirlerdiń damýyn jedeldetýge múmkindik týyp otyr. Osy rette, Aqmola oblysy Nıderlandy, AQSh, Reseı, Túrkııa jáne Izraıl elderimen áriptes», - deıdi vedomstvodan.

Naqtyraq aıtsaq, gollandııalyq ınvestor qazaqstandyq áriptesterimen óńirde 40,7 mlrd teńgeniń ınvestıtsııalyq jobasy - jel elektr stansasy qurylysyn júzege asyrýda. Stansanyń qýaty - 100 MVt. Joba 20 adamǵa arnalǵan.

«AQSh kompanııasymen birlesip jabyq basseıinde albyrt balyǵyn ósirý qolǵa alynbaq. Bul jobanyń quny 2 mlrd teńgeden asady. Jobanyń jyldyq qýaty 500 tonnany quraıdy. Túrkııalyq ınvestormen gofrokarton qaǵazynan qoraptar shyǵarý josparda bar. Joba quny 40 mln AQSh dollary shamasynda. Izraıldik ınvestormen qaz jáne albyrt balyqtaryn ósiretin ferma ashý qarastyrylýda. Fermada jylyna 10 myń tonna qaz eti óndiriletin bolady. Bul eki jobanyń jalpy quny 100 mln AQSh dollaryn quramaqshy», - dep tolyqtyrdy vedomstvodan.

Sonymen qatar, reseılik kompanııalarmen áriptestik baǵytynda birlesken jobalardy júzege asyrý qarastyrylyp otyr. Onyń ishinde qýaty 100 MVt kún energııa stansasy, traktor, arnaıy tehnıka, egis keshenderin qurastyrý zaýyty bar.