Aqmola oblysyna 1,5 myńǵa jýyq Reseı azamaty keldi

KÓKShETAÝ. QazAqparat – Aqmola oblysyna 1500-ge jýyq Reseı azamaty keldi. Osyǵan baılanysty Aqmola oblysynyń halyqqa qyzmet kórsetý ortalyqtarynda qosymsha terezeler ashyldy, dep habarlaıdy QazAqparat tilshisi.

Aqmola oblysy ákiminiń orynbasary Malǵajdar Tátkeevtiń aıtýynsha, 21 qyrkúıekten beri Aqmola oblysyna Reseı Federatsııasynyń 1436 azamaty ýaqytsha keldi.

Al, ótken táýlikte 601 adam kelgen.

«Olardyń ishinde ishki ister organdaryna – 351 adam, vızalyq kóshi-qon portaly arqyly - 264 adam, «E – qonaq» mobıldi qosymshasy arqyly - 821 adam ótinish bildirdi. Qazaqstan Respýblıkasynda ýaqytsha turýǵa 257 ruqsat berildi», - dedi Malǵajdar Tátkeev óńirlik kommýnıkatsııalar qyzmetinde ótken brıfıngte.

Brıfıngte aıtylǵandaı, aımaqta turýǵa ruqsaty bar Reseı Federatsııasynyń 4499 azamaty, onyń ishinde 269 kámeletke tolmaǵan bala turaqty tirkeýde tur.

Bıylǵy jyldyń basynan beri Reseı azamattaryna turaqty turýǵa 343 ruqsat berildi, sonymen birge 57 reseılik Qazaqstan azamattyǵyn qabyldaý týraly qoldaýhat qabyldady, onyń ishinde 10 qandas bar.

«Azamattarǵa arnalǵan úkimet «memlekettik korporatsııasy» kommertsııalyq emes aktsıonerlik qoǵamynyń Aqmola oblysy boıynsha fılıaly dırektorynyń orynbasary Jasqaırat Eslıambekovtyń aıýynsha, 26 qyrkúıekte oblys boıynsha halyqqa qyzmet kórsetý ortalyqtaryna sheteldik azamattyń JSN alý úshin 508 ótinish berýshi júgindi.

Ótinishtiń basym bóligi Kókshetaý qalasynda - 287, Býrabaı aýdanynda - 73, Qosshy qalasynda - 49 tirkelgen.

«Kókshetaý qalasynyń halyqqa qyzmet kórsetý ortalyqtarynda uzyn sonar kezekti boldyrmaý úshin JSN berý boıynsha qyzmetti Áýezov kóshesi, 289 A mekenjaıynda ornalasqan Kókshetaý qalasynyń 1 bóliminde ǵana kórsetý týraly sheshim qabyldandy, onda JSN alý úshin sheteldik azamattardan ótinish qabyldaıtyn qosymsha úsh tereze aıqyndaldy. Sondaı-aq, jeke elektrondy kezek paıda boldy. Bul sharalar qala turǵyndarynyń halyqqa qyzmet kórsetý ortalyqtarynda memlekettik qyzmetterdi kedergisiz alýy úshin qabyldanýda», - dedi Jasqaırat Eslıambekov.

Ótinish bildirgen azamattardy qabyldaý úshin tereze sanyn arttyrý jumysy búkil oblysta, atap aıtqanda Býrabaı aýdanynda, Stepnogor jáne Qosshy qalalarynda júrgizilip jatyr.

Aıta keteıik, Álıhan Smaıylov quzyrly organdarmen Reseıden kelýshiler sanynyń artýyn talqylaǵan edi.