Aqmola oblysy bıyl taýarlyq ónim boıynsha rekordtyq kórsetkishke jetýi múmkin

ASTANA. QazAqparat – Aqmola oblysynyń ákimi Ermek Marjyqpaev óńirdegi mańyzdy óndiris nysandary týraly baıandady, dep habarlaıdy QazAqparat tilshisi.

Bul tizimde altyn shyǵaratyn «RG PROCESSING» zaýyty, «SG BRICK» kirpish zaýyty, «Qazaqaltyn tehnolodjı» fabrıkasynyń adaptatsııasy, «SG Beton» temirbeton buıymdary zaýyty bar.

«Bıyl iske qosylatyn iri jobalar – Arshaly aýdanyndaǵy «Boreı Energo», Zerendi qalasyndaǵy «Etalon Vınd Paýer» jel elektr stantsııalary, Bulandy aýdanyndaǵy «Makınka qus fabrıkasynyń» úshinshi kezegi jáne Arshaly aýdanyndaǵy ekinshi «SG BRICK» kirpish zaýyty. Sondaı-aq, bıyl organıkalyq tyńaıtqyshtar óndirý boıynsha «Býrabaı Bıogaz» JShS, «Boreı Energo» jel elektr stantsııasynyń ekinshi kezegin, «Qazaq Daımonds» tehnıkalyq almas kontsentratyn shyǵarý fabrıkasyn, «SG Beton» temirbeton buıymdarynyń óndirisin keńeıtý jáne basqa da jobalar qolǵa alynady», - dedi oblys ákimi ortalyq kommýnıkatsııalar qyzmetinde ótken eseptik brıfıngte.

Oblys ákimi osy óndiristerdiń jobalyq qýaty men jumys istep turǵan kásiporyndardyń turaqty dınamıkasyn saqtaý arqyly jyl sońynda taýarlyq ónim kólemi rekordtyq kórsetkish - 1,5 trln teńgege jetetinin aıtty.

«Jalpy, el kóleminde jekelegen ónim túrleri boıynsha moıyntirek – 100%, árbir ekinshi mamandandyrylǵan avtomobıl, jınaıtyn kombaın jáne traktor, árbir úshinshi keramıkalyq kirpish jáne árbir úshinshi kılogramm altyn bizdiń aımaqta óndiriledi», - dedi Ermek Marjyqpaev.

Buǵan deıin spıker Aqmola oblysy sońǵy úsh jyl boıy áleýmettik-ekonomıkalyq damýdyń negizgi kórsetkishterin oryndaý boıynsha aldyńǵy qatarda ekenin aıtqan edi.