Aqmola oblystyq sotynda elektrondy tehnologııalardyń tusaýkeseri ótkizildi

KÓKShETAÝ. QazAqparat- Aqmola oblystyq soty elektrondy sot tóreligin damytý suraqtary boıynsha qoǵam belsendilerimen kezdesý barysynda oblys sottary qoldanatyn elektrondy tehnologııalardyń tusaýkeserin ótkizdi, dep habarlaıdy QazAqparat tilshisi vedomstvonyń baspasóz qyzmetine silteme jasap.

Tusaýkeser rásimine Qazaqstan halqy Assambleıasy, saıası  partııalar, jastar uıymdary, ÚEU, BAQ ókilderi jáne oblystyń medıatorlary qatysty.
 

Aqmola oblystyq sotynyń tóraǵasy Nurǵazy Ábdiqanov qoǵam belsendilerimen kezdesý barysynda «100 naqty qadam» Ult josparyn iske asyrý aıasynda, mańyzdy jańǵyrtýlar ótkizilgenin atap ótti. «Sottar barlyq bekitilgen 11 qadamdy iske asyrdy. Búgingi tańda respýblıkanyń jáne oblys boıynsha barlyq sot otyrysy zaldary 100 paıyzǵa aýdıo jáne beıne tirkeý júıesimen jabdyqtalǵan. Bul «100 naqty qadam» Ult josparynyń 20-shy qadamyn iske asyrýdy aıaqtaǵanyn jáne sottardyń ashyqtyǵynyń artýyn kórsetedi» - dedi N.Ábdiqanov.

Tusaýkeser rásimi barysynda Sottar ákimshisiniń qyzmetkerleri sottardaǵy jańa elektrondy tehnologııalardyń múmkindikterin usynyp,  sot tóreliginiń ashyqtyǵy men qoljetimdiligin kórsetti. Qoldanylatyn tehnologııalar men jobalar jóninde qyzyqty jáne túsinikti etip aıtyp berdi. Kezdesý ekskýrsııa túrinde ótkizilip, qonaqtarǵa sottarda qoldanylatyn jańa aqparattyq servıster qyzmeti tanystyryldy. Atap aıtqanda: elektrondy túrde ótinishterdi joldaý, gıbrıdti elektrondy poshta, ShPI, SMS-habarlama, sot otyrystaryndaǵy aýdıo jáne beıne tirkeý, vıdeokonferents baılanysy arqyly qashyqtyqtan sot otyrysyna qatysý, Sot kabıneti men sottyń Internet-resýrsynyń qyzmeti, elektrondy muraǵattyń keleshegi jáne taǵy basqalar.
 

Oblystyq sottyń tóraǵasy tusaýkeser rásimin qorytyndylaı kele aǵymdaǵy jyldyń 10 aıynda elektrondy túrde «Sot kabıneti» arqyly oblys sottarynda 19 983 qujat, onyń ishinde 17 646 talap-aryz tirkelgenin atap ótti. «Ákimshilik isterdi joldaý» servısi arqyly elektrondy túrde 11 532 ákimshilik is joldanyp tirkelgen.
 

«Qazirgi zamanǵy tehnologııalardy qoldaný sot isin júrgizýdi jeńildetedi, azamattardyń ýaqyty men qarajatyn únemdeıdi, ashyqtyq pen qoljetimdilikti qamtamasyz etedi. Sot júıesi úshin bul sot isin júrgizýdi avtomattandyrady jáne ońtaılandyrady, aqparattyq tehnologııalardy damytyp, bıýdjet qarajatyn únemdeıdi» - dedi tóraǵa.
 

Sot tóraǵasy 21 qarashada Astana qalasynda Táýelsizdik Saraıynda Elbasynyń qatysýymen respýblıka sýdıalarynyń VII sezdi ótetinin, onda sottardyń damýy boıynsha naqty baǵyttar anyqtalatynyn atap ótti.