Aqmola oblysynyń birqatar eldi mekeninde sý sorý jumystary júrgizilýde
Jyl saıyn Aqmola oblysynyń aýmaǵynda sý tasqyny shıelenisti jaǵdaıda ótedi. Bıylǵy jylǵy naýryzdyń 25-nen bastap Tselınograd jáne Arshaly aýdandarynyń aýmaqtarynda sý tasqynyna qarsy is-sharalardy ótkizý úshin TJD jeke quramynan 18 adam jáne 5 tehnıka jiberildi.
Turǵyn úılerge sýdyń kirýine jol bermeý úshin eldi mekenderden qar shyǵarý, sý ótkizý qurylystaryn, kanaldar men aryqtardy tazartý sharalary qolǵa alynǵan.
Aqmola oblysy TJD baspasóz qyzmetiniń málimetinshe, oblys boıynsha barlyǵy 2 mln astam tekshe metr qar shyǵaryldy, 300 tonna janar-jaǵar maı, 24 tonna ınertti materıaldar jáne 100 myń qap daıyndaldy.
Qazirgi ýaqytta Tselınograd, Arshaly, Jarqaıyń aýdandaryndaǵy eldi mekenderde, sondaı-aq, Kókshetaý jáne Qosshy qalalarynda erigen qar sýyn aǵyzý jumystary qarqyndy júrgizilýde. Barlyǵy 64 myń tekshe metrden astam sý soryldy.
«Astrahan aýdanynyń ortalyǵynda kósheler men turǵyn úı aýlalarynda 4 tehnıka erigen qar sýyn soryp, syrtqa aǵyzýda. Al Arshaly aýdany Jibek Joly aýylynda sý sorý jumystaryna 50-den astam tehnıka jumyldyrylǵan. Aýylda turǵyn úıler men aýlalaryn sý basý deregi tirkelgen joq», - dedi vedomstvodan.
Eske salaıyq, Kókshetaýda mekteptiń jertólesin sý basyp qalǵan bolatyn.