Aqmola oblysynyń bir aýylynda eki birdeı jaıly mektep ashyldy
«Jaıly mektep» ulttyq jobasy aıasynda ashylǵan bilim oshaqtarynyń biri mektep-gımnazııasy bolsa, ekinshisi IT-lıtseıi. Jańa oqý jylynda barlyǵy 1 800-ge jýyq oqýshyny 100-den astam pedagog sapaly bilim nárimen sýyndatatyn bolady.
Bilim oshaqtary 3 qabatty, synyp bólmeleriniń barlyǵy zamanaýı jabdyqtarmen jabdyqtalǵan. Sapaly bilim berý úshin munda barlyq jaǵdaı jasalǵan. Interaktıvti taqtalary bar pándik synaptardan bólek, sheberhanalar men zerthanalar da bar. Balalardyń qaýipsizdigin qamtamasyz etý maqsatynda beınebaqylaý kameralary men dabyl túımeleri ornatylǵan.
Bilim oshaqtarynyń ashylýyna jáne alǵashqy qońyraý sharasyna Aqmola oblysynyń ákimi Marat Ahmetjanov qatysyp, quttyqtaý sóz sóıledi.
«Elordaǵa irgeles jatqan Tselınograd aýdanynda halyqtyń kóshi-qonyna jáne demografııalyq ósýine baılanysty uzaq ýaqyt boıy oqýshy oryndarynyń tapshylyǵy baıqaldy. Prezıdent Qasym-Jomart Toqaev bastamashylyq etken «Jaıly mektep» jobasy mektepterdegi oryn tapshylyǵy máselesin sheshedi, oqýshylar men pedagogtar úshin qolaıly jaǵdaı jasaıdy jáne qala men aýyl mektepteri arasyndaǵy bilim berý sapasyndaǵy alshaqtyqty azaıtady», - dedi oblys ákimi.
Mektepterdiń saltanatty ashylý sharasyna Densaýlyq saqtaý mınıstri Aqmaral Álnazarova men Májilis depýtaty Ashat Aımaǵambetov te qatysyp, jınalǵan jurtshylyqty merekemen quttyqtady.
«Qazir bilim berý salasyna erekshe kóńil bólinýde. Bizdiń aýylda jańa mektepter salynyp jatqanyna kýá boldyq. Oqý bir aýysymda bolady, al túski astan keıin balalar úıirmeler men sport sektsııalaryna qatysa alady», - dedi mektep-gımnazııasy ata-analar komıtetiniń tóraǵasy Quttybaı Baıǵabylov.
Aqmola oblysy ákimdigi baspasóz qyzmetiniń málimetinshe, jańa oqý jylynda óńirde 3 mektep paıdalanýǵa berildi. Onyń ekeýi «Jaıly mektep» ulttyq jobasy aıasynda Talapker aýylynda salynǵan mektep-gımnazııasy men IT-lıtseıi bolsa, taǵy bireýi Qosshy qalasyndaǵy 1 200 oryndyq jańa mektep.
Budan bólek, jyl sońyna deıin taǵy 11 bilim berý mekemesiniń esigin aıqara ashatyny josparlanǵan, onyń jeteýi «Jaıly mektep» jobasy aıasynda salynyp jatyr.
Jalpy, óńirde 528 mektep bar. Onda 150 myńnan astam oqýshy bilim alady. Onyń ishinde 13 myńǵa jýyq bala alǵash ret mektep tabaldyryǵyn atap otyr.
Aıta ketsek, budan buryn Aqmola oblysynda 462 mektepte qaýipsizdik sabaǵy ótkenin jazǵan edik.