Aqmola oblysynda jyl basynan beri qyzylsha juqtyrýdyń 244 deregi tirkeldi

<p>KÓKShETAÝ. KAZINFORM - Aqmola oblysynda bıylǵy jyldyń basynan beri qyzylsha juqtyrýdyń 244 deregi tirkeldi, onyń 229-i qańtar aıynyń úlesinde.</p>

Aqmola oblysy boıynsha sanıtarlyq-epıdemıologııalyq baqylaý departamenti basshysynyń orynbasary Serik Omarhanovtyń málimetinshe, sońǵy aptada óńirde qyzylsha juqtyrǵandar sany sál kemigen.

«Qazirgi kezde, óńirde qyzylshaǵa baılanysty jaǵdaı turaqtalyp keledi. Ótken aptada 57 jaǵdaı tirkeldi, ıaǵnı 10,9 paıyzǵa az. Jalpy, óńirde jappaı ımmýndaý sharalary jalǵasýda. Al, bıylǵy jyldyń basynan beri oblys boıynsha qyzylsha juqtyrýdyń 244 deregi rastaldy, onyń 229-i qańtarda, qalǵan 15 aqpan aıynyń úlesinde», – dedi Serik Omarhanov.

Aıtýynsha, oblys boıynsha qosymsha jappaı ımmýndaýǵa 44 600 adam jatady, onyń ishinde 6-10 aılyq jas aralyǵyndaǵy balalar. Qazirgi kezde ımmýndaýǵa jatatyn 34 myń adam bar, olardyń 78 paıyzy ekpe aldy.

Aıta ketsek, ótken jyly Aqmola oblysynda qyzylsha juqtyrǵandar sany 490 adamǵa jetse, 379 jaǵdaıda (zerthanalyq – 218 jaǵdaı (58%), epıdemıologııalyq baılanys boıynsha – 66 (17%), klınıkalyq – 47 (12%) rastaldy. Tórtinshi toqsanda 340 jaǵdaı tirkeldi, ıaǵnı, ósim 30 esege joǵary boldy.

Eske salaıyq, budan buryn Aqmola oblysynda jyl basynan beri 11 adam qyzylsha juqtyrǵanyn jazǵan edik.