Aqmola oblysynda jańa saılanǵan ákimder qyzmetine kiristi
Qarashanyń 5-de elimizde alǵash ret pılottyq rejımde aýdandar men oblystyq mańyzy bar qalalardyń ákimi saılandy.
Aqmola oblysynda Aqkól, Shortandy, Astrahan, Esil jáne Jaqsy aýdandarynyń ákimderi saılandy.
Aýmaqtyq saılaý komıssııasynyń aqparatyna sáıkes, Aqkól aýdanynda saılaýshylardyń kelýi - 73 paıyz.
Kópshilik daýys Birjan Ábdirahmanovqa berildi.
Oblys ákimdigi baspasóz qyzmetiniń málimetinshe, aımaq basshysy Marat Ahmetjanov búgin Aqkól jáne Shortandy aýdandarynda bolyp, aýdan aktıvterine jańa ákimderdi tanystyrdy.
Aımaq basshysy Aqkól aýdanynda bolǵanynda jańa ákimge aýdannyń odan ári áleýmettik-ekonomıkalyq damýy boıynsha mindetter qoıylǵanyn atap ótti.
- Ár turǵynǵa senim bildirgeni úshin alǵysym sheksiz. Óz tarapymnan aýdanymyzdyń órkendeýi úshin bar kúsh-jigerim men tájirıbemdi jumsaımyn, - dedi Birjan Ábdirahmanov.
Birjan Tasbolatuly Ábdirahmanov eńbek jolyn 2005 jyly «Astı-Stroı» jaýapkershiligi shekteýli seriktestiginde qurylys ýchaskesiniń sheberi bolyp bastaǵan.
2016-2023 jyldary Aqmola oblysynyń energetıka jáne turǵyn úı-kommýnaldyq sharýashylyq basqarmasynda túrli laýazymdarda jumys istedi.
2023 jyldyń qyrkúıeginen Aqkól aýdany ákiminiń orynbasary qyzmetin atqardy.
Sonymen birge, Shortandy aýdanynda saılaýshylardyń 72 paıyzy óz tańdaýyn jasaǵan. Onyń 91 paıyzy Saǵyndyq Shabarovqa daýys berdi.
Saǵyndyq Serikbaıuly Shabarov 1982 jyly Aqmola oblysy Birjan sal aýdanynda týǵan. Eki joǵary bilimi bar.
Eńbek jolyn 2022 jyly Stepnogorsk qalalyq qazynashylyq bóliminiń jetekshi mamany bolyp bastady.
2006 - 2016 jyldary Stepnogor qalasynyń jergilikti atqarýshy organdarynda jaýapty laýazymdarda jumys istedi.
2016-2022 jyldary Kókshetaý qalasy ákiminiń jáne Stepnogor qalasy ákiminiń orynbasary bolyp jumys istedi.
2022 jyldyń tamyz aıynan bastap Shortandy aýdanynyń ákimi laýazymyn atqardy.
Aıta ketsek, budan buryn Aqmola oblysynda saılaý qorytyndysy jarııalanǵanyn jazǵan edik.