Aqmola oblysynda sý tasqynynan úıleri jaramsyz bolǵan turǵyndardyń máselesi qalaı sheshilip jatyr

<p>KÓKShETAÝ. KAZINFORM - Bulandy aýdanyndaǵy Kapıtonovka aýylynda kóktemgi sý tasqynynan zardap shekken 15 otbasy jańa úıdiń kiltin aldy. Aqmola oblysynyń Jarqaıyń jáne Bulandy aýdandaryndaǵy Prıgorodnoe, Ivankovka, Kapıtonovka, Jýravlevka jáne Voznesenka aýyldarynda 3,4 mlrd teńgege barlyǵy 144 úı salý josparlanǵan bolsa, búgingi tańda úsh aýylda turǵyn úı qurylysy aıaqtalýǵa jaqyn.</p>

Aqmola obylysy ákimdigi baspasóz qyzmetiniń málimetinshe, topan sýdan zardap shekken aqmolalyqtarǵa «Qazaqstan halqyna» qory qol ushyn sozǵan. Aqmola oblysynyń ákimi Marat Ahmetjanov pen «Qazaqstan halqyna» qoǵamdyq qorynyń tóraǵasy Bolat Jámishev Ivankovka jáne Voznesenka aýyldarynda boı kóterip jatqan úılerdiń qurylys jumystarymen tanysty. Kapıtonovka aýylynda 15 otbasyǵa jańa baspananyń kilti tabys etti. 

Foto: Aqmola oblysy ákimdigi

«Búgin barshamyz qýanyshty oqıǵanyń kýási bolyp otyrmyz. Kóktemgi sý tasqynynan zardap shekkenderge jańa úıdiń kiltin tabys ettik. Sońǵy 8 jylda Bulandy aýdanynda Tótenshe jaǵdaı jarııalanbaǵan. Qutqarýshylar men kommýnaldyq qyzmetkerler, eriktiler jáne jergilikti turǵyndar birlesip tabıǵat apatymen kúresti. Qazirgi tańda oblys kóleminde de, aýdan kóleminde de sý tasqynynyń zardabyn joıý jumystary qarqyndy júrgizilip jatyr» - dedi oblys ákimi Marat Ahmetjanov.

Aıtýynsha, búginde 11 otbasy qaýipsiz jerge kóshirilgen, 112 januıanyń múlki qalpyna keltirildi. Sonymen qatar 115 otbasyǵa múliktik zalal úshin ótemaqy tólendi. Jaqyn kúnderi Voznesenka, Ivankovka jáne Jýravlevka aýyldarynda taǵy 100 úıdiń qurylysy aıaqtalady. 

Foto: Aqmola oblysy ákimdigi

Aıta ketsek, «Qazaqstan halqyna» qorymen yntymaqtastyq týraly memorandýmǵa qol qoıylǵannan keıin aýdany 80 sharshy metr bolatyn standartty úılerdiń qurylysy bastalǵan edi. Kóktemgi sý tasqynynan zardap shekken 5 aýyldyń árqaısysynan jańa úıler salý úshin sý basýǵa jatpaıtyn jerlerden jer telimderi bólinip, qajetti ınjenerlik ınfraqurylym júrgizildi. Oblys ákimdigi men jergilikti qoǵam belsendileri birlesip, qurylys jumystarynyń barysy men sapasyn jiti baqylaýda. 

Foto: Aqmola oblysy ákimdigi

Jańa úılerde turǵyndar úshin barlyq jaǵdaı jasalǵan. Atap aıtqanda, úı aýmaǵy abattandyrylyp, sý, jylý jáne elektr jelileri tartylǵan. Ár úıdiń aýmaǵynda 10 sotyq jer telimi de qarastyrylǵan. Kóktemde úılerin sý basqandardyń biri – Gúlnar Qalıýlınanyń otbasy. Komıssııa sheshimimen onyń úıi turýǵa múldem jaramsyz dep tanylǵan.

«Meniń osy aýylda turǵanyma 45 jyl. Jyl saıyn úıimizge sý kiredi, bıyl sý jyldaǵydan kóp boldy. Sodan úıimiz jaramsyz bolyp qaldy. Osyndaı ıgi iske qoldaý bildirip otyrǵan Memleket basshysyna, Úkimetke shynaıy alǵysymdy bildiremin», - dep qýanyshymen bólisti Gúlnar Qalıýlına.

Eske salaıyq, budan buryn Býrabaı aýdanynda 40-qa jýyq otbasy baspanaly bolǵanyn jazǵan edik.