Aqmola oblysynda sý tasqynynan kelgen shyǵyn qysqa merzimde óteledi
«Búgingi tańda Aqmola oblysy boıynsha sý tasqyny jaǵdaıy baqylaýda. Bilim berý jáne áleýmettik obektiler shtattyq rejımde jumys istep jatyr. Jabaı, Nura, Esil jáne Kolýton ózeninde sý arnasynan shyǵý qaýpi saqtalyp otyr. Táýekeldiń aldyn alý úshin ózenderdiń 64 ýchaskesinde muzdy jarý jumystary júrgizilip jatyr. Oblystyń 4 aýdanynyń eldi mekender, sondaı-aq, Astana mańyndaǵy Arshaly, Ereımentaý, Tselınograd jáne Shortandy aýdany qamtyldy. Kókshetaý qalasyndaǵy Qylshaqty ózeniniń deńgeıi kezeń-kezeńimen 2 metrge deıin kóterilýi baıqalady. Qaterli deńgeıi 1,2 metr, sonyń saldarynan jaǵalaý boıyndaǵy aýmaqtardy sý basýda», - dedi Eldos Ramazanov OKQ-de ótken brıfıngige ZOOM arqyly qatysa otyryp.
Oblys ákimi orynbasarynyń málimdeýinshe, Memleket basshysynyń tapsyrmasyn oryndaý aıasynda turǵyndar men olardyń múlkine tóngen qaýip-qaterdi tómendetý úshin qosymsha sharalar qoldanyldy.
«Uzyndyǵy 32 shaqyrym bolatyn qorǵanysh úımeleri turǵyzyldy. Onyń ishinde Astana mańyndaǵy aımaqtarda 16 shaqyrymnan astam topyraq úıindisi ornatyldy. Sý obektileriniń 18 shaqyrymdyq jaǵalaýy nyǵaıtyldy. Sý tasqynynan kelgen shyǵyndy esepteý úshin arnaıy komıssııa quryldy. Keltirilgen shyǵyn qysqa merzim ishinde óteledi. Qazir Astana sý qoımasynan sekýndyna 350 tekshe metr kólemde sý jiberilip jatyr», - deıdi ol.
Aıta ketsek, Aqmola oblysynda sý tasqynymen kúreske 2,5 myń adam, 1 myńnan astam tehnıka jumyldyryldy.