Aqmola oblysynda múgedektigi bar adamdar úshin 900-den astam nysan beıimdelgen

<p>KÓKShETAÝ. KAZINFORM &ndash; Múgedektigi bar adamdardyń zańdy quqyqtaryn qamtamasyz etý jáne olar úshin qoljetimdi ortany qalyptastyrý maqsatynda Aqmola oblysynda 941 áleýmettik ınfraqurylym nysany tolyq beıimdeldi. Bul týraly QR Eńbek jáne halyqty áleýmettik qorǵaý mınıstrliginiń baspasóz qyzmeti málim etti.</p>

Qazirgi ýaqytta elimizde Qazaqstan Respýblıkasynda múgedektigi bar adamdardyń quqyqtaryn qamtamasyz etý jáne ómir súrý sapasyn jaqsartý jónindegi 2025 jylǵa deıingi ulttyq jospar, «Amanat» partııasynyń 2023 – 2027 jyldardaǵy jol kartasy jáne Memleket basshysynyń tapsyrmasy boıynsha ázirlengen «Halyqpen birge» jobasy iske asyrylyp otyr.

«Amanat» partııasynyń jol kartasynda 2023 – 2027 jyldar aralyǵynda Interaktıvti qoljetimdilik kartasyna (budan ári – Karta) engizilgen 35 myńnan astam nysandy beıimdeý boıynsha jumys kózdelgen. Jyl saıyn obektilerdiń 20 %-y beıimdelýge jatady.

Osylaısha, 2023 jyly – Kartadaǵy obektilerdiń 20%, 2024 jyly – 40%, 2025 jyly – 60%, 2026 jyly – 80%, 2027 jyly – 100%. Qazirgi ýaqytta el boıynsha 16 541 obekt tolyǵymen beıimdelgen.

Osy jyldyń sońyna deıin Aqmola oblysy boıynsha 653 nysandy beıimdeý josparlanǵan, óńirde jospar artyǵymen oryndalyp, 941 nysanda beıimdeý jumystary júrgizildi.

Máselen, óńirdegi 941 obektiniń ishinen tómendegi obektiler múgedektigi bar adamdardyń barlyq sanattary úshin qol jetimdi:

- densaýlyq saqtaý obektileri – 132;

- bilim berý obektileri – 337;

- mádenıet nysandary – 87;

- saýda jáne qyzmet kórsetý obektileri – 95;

- memlekettik uıymdar – 194;

- sport nysandary – 16;

- kólik ınfraqurylymynyń obektileri – 9;

- qoǵamdyq tamaqtandyrý obektileri – 5;

- áleýmettik qorǵaý obektileri – 8;

- basqalary – 58.

«Men Kókshetaý qalasynda turamyn, bizderge kún saıyn túrli áleýmettik mańyzy bar mekemelerge barýdyń qajettiligi týyndaıdy. Atap aıtsaq, kúndelikti muqtajdyǵymyzdy óteý úshin dúkender, dárihanalar, aýrýhanalar. Sol sebepti, osy nysandarǵa qoljetimdiliktiń bolýy men úshin óte mańyzdy. Mysaly, qala kóshelerinde kórý qabileti nashar adamdarǵa arnalǵan arnaıy joldar bar, bul bizge qozǵalý kezinde óte yńǵaıly, jaıaý júrginshilerge arnalǵan belgiler kórinetin jerge qoıylǵan jáne árdaıym boıalyp, jańartylyp otyrady, kóptegen nysandarda kreslo-arbalarmen qozǵalatyn adamdar úshin arnaıy kótergish baspaldaqtar da bar, bul óte mańyzdy jaıt. Kóptegen áleýmettik obeetilerge kirý kezinde baspaldaqtyń bar ekeni týraly eskertýler bar. Baǵyt kórsetkishteri ornatylǵan, bul da óte yńǵaıly. Mysaly, M. Áýezov kóshesinde kórý qabileti nashar adamdarǵa arnalǵan arnaıy jol bar. Men júzýge baratyn «Býrabaı» sport saraıynda múgedektigi bar jandar úshin kıim aýystyrýǵa arnalǵan arnaıy bólme bar. Qoǵamdyq kólikte jol aqysy tegin, sondaı-aq avtobýstarda múgedektigi bar adamdarǵa arnalǵan arnaıy oryndar da qarastyrylǵan», – dedi ekinshi top múgedektigi bar Sáýle Bolatova.

Budan basqa memlekettik baqylaý sheńberinde Halyqty áleýmettik qorǵaý salasyndaǵy retteý jáne baqylaý komıtetiniń Aqmola oblysy boıynsha departamenti bıyl memlekettik basqarý, densaýlyq saqtaý, áleýmettik qorǵaý, mádenıet, jeke kásipkerlik jáne t.b. salalardaǵy áleýmettik ınfraqurylym obektilerine 63 tekserý júrgizdi, onyń ishinde: 22 – jospardan tys tekserýler, 35 – profılaktıkalyq baqylaý jáne prokýratýranyń talaby boıynsha 2 tekserý boldy.

Tekserý qorytyndysy boıynsha anyqtalǵan buzýshylyqtardy joıý týraly 32 uıǵarym berilip, 6,6 mln teńgeden astam somaǵa 12 ákimshilik aıyppul salyndy.

Obektilerdiń menshik ıelerine profılaktıkalyq baqylaý júrgizý kezinde buzýshylyqtar alǵash ret anyqtalǵan kezde olardy ákimshilik jaýapkershilikke tartpastan joıý týraly nusqamalar ǵana beriletinin atap ótý qajet. Nusqama belgilengen merzimde oryndalmaǵan jaǵdaıda aıyppul salynady.