Aqmola oblysynda medıtsına salasynyń bir top qyzmetkeri marapattaldy
Aqmola oblysynyń medıtsına salasynda shamamen 14 myń aq halatty abzal jan eńbek etip jatyr. Óńirde densaýlyq saqtaý júıesin jańǵyrtýǵa kóp kóńil bólinip keledi. Sońǵy jyldary emdeý-profılaktıkalyq mekemeleriniń jabdyqtary túbegeıli jańartyldy, ozyq medıtsınalyq tehnologııalar, jańa nysandar paıdalanýǵa berilip jatyr. Ótken jyly 5 mlrd teńgege 250-den astam medıtsınalyq tehnıka men jabdyq satyp alyndy. Sońǵy 4 jylda 8 jańa nysan salyndy. Kadr máselesi de birtindep sheshilip keledi. Búginde oqý oryndarynda 380-nen astam jas aqmolalyq medıtsına mamandyǵy boıynsha bilim alyp jatyr. Aýyldyń medıtsınalyq ınfraqurylymyn jaqsartý aıasynda 38 nysannyń qurylysy qolǵa alynǵan.
«Kókshetaý» mádenıet saraıynda uıymdastyrylǵan saltanatty is-sharada aımaq basshysy Marat Ahmetjanov aqmolalyqtar atynan medıtsına qyzmetkerlerin quttyqtap, qajyrly eńbegi úshin alǵys bildirdi.
«Kez kelgen memlekettiń basty qundylyǵy – adam, al onyń turaqtylyǵy men órkendeýiniń kepili – azamattardyń densaýlyǵy. Búgingi tańda qoǵamda medıtsına qyzmetkerleriniń bedeli artyp keledi. Olar naýqastardy emdeýde asa kásibı sheberlik pen shynaıy janashyrlyq tanytyp jatyr», - dedi M.Ahmetjanov.
Aımaq basshysy atap ótkendeı, óńirde jedel járdem kóliginiń tapshylyǵy máselesi jıi kóterilip keledi. Osy rette, oblys ákiminiń bastamasymen lızıngke zamanaýı medıtsınalyq tehnıkamen jabdyqtalǵan 50 reanımobıl satyp alý týraly sheshim qabyldanǵan. Sonymen qatar Ulttyq jedel medıtsınany úılestirý ortalyǵy aımaqqa sanıtarlyq avıatsııa tikushaǵyn bóldi. Bul aýyr naýqastardy joǵary bilikti medıtsınalyq kómek kórsetý úshin eń qysqa merzimde tasymaldaýǵa múmkindik beredi.
Іs-shara barysynda oblystyń 30-dan astam dárigeri men densaýlyq saqtaý ardagerleri «Eńbek ardageri» medali, «Densaýlyq saqtaý isine qosqan úlesi úshin» tósbelgisi jáne oblys ákiminiń Alǵys hatymen marapattaldy. Sondaı-aq, sala ardageri Bolat Janádilovke «S.Q.Nurmaǵanbetovke 100 jyl» birinshi medali tabys etildi.
Aıta ketsek, budan buryn aqmolalyq dárigerler SQO sý basqan eldi mekenderindegi turǵyndarǵa kómek kórsetip jatqanyn jazǵan edik.