Aqmola oblysynda esirtki satqan mektep jattyqtyrýshysy 10 jylǵa sottaldy

<p>KÓKShETAÝ. KAZINFORM &ndash; Arshaly aýdanynyń Balalar men jasóspirimderdiń sport mektebiniń shańǵy sport jattyqtyrýshysy esirtki zattaryn zańsyz satqany úshin sottaldy.</p>

Aqmola oblysy soty baspasóz qyzmetiniń málimetinshe, er adam Astana qalasynan Arshaly aýdanynda satý maqsatynda esirtki tasymaldaý kezinde ustalǵan. Onyń avtokóligin tintý kezinde júk salǵyshtan jalpy salmaǵy 39 kg-nan asatyn 4 paket gashısh tabylyp, tárkilendi.

Osylaısha, er adam Qylmystyq kodekstiń 297-babynyń 3 bóligi 3 bólimshesi boıynsha (esirtki zattaryn, satý úshin asa iri mólsherde zańsyz satyp alý, saqtaý, tasymaldaý) qylmys jasaǵan.

Sottalýshynyń kinási onyń avtokóligin tintý jáne esirtki zattary salynǵan paketterdi alý hattamasymen, sarapshylardyń qorytyndylarymen, tirkelgen qońyraýlary bar uıaly telefondy tekserý hattamasymen, beınekameralardyń jazbalarymen, tintý hattamalarymen jáne kýágerlerdiń aıǵaqtarymen dáleldendi. 

Jaza taǵaıyndaý kezinde sot jeńildetetin mán – jaılardy, ıaǵnı, sottalýshyda kishkentaı balalarynyń baryn jáne aýyrlatatyn mán-jaılardyń bolmaýyn eskerdi. 

«Aqmola oblysynyń mamandandyrylǵan aýdanaralyq qylmystyq sotynyń úkimimen er adamǵa 10 jylǵa bas bostandyǵynan aıyrý jazasy taǵaıyndaldy. Tárkilengen esirtki quraldary joıyldy. Sot úkimi zańdy kúshine engen joq», - dedi vedomstvodan.

Aıta ketsek, budan buryn esirtki zerthanasyn qurǵan aqmolalyq 14 jylǵa sottalǵanyn jazǵan edik.