Aqmola oblysynda eldi mekenderden 2 mln tekshe metr qar shyǵaryldy
Áýeden baqylaý arqyly kóktemgi sý tasqynynyń qaýpi bar aımaqtardaǵy qar men ergin qar sýynyń mólsherine, sondaı-aq, Esil men Nura ózenderindegi arnalar men muz jamylǵysynyń jaı-kúıine zertteý júrgizildi. Sonymen qatar, Astana sý qoımasy jáne Bezymıannaıa bógeti arnalaryndaǵy qardyń qory men erigen qar sýynyń aǵysyna nazar aýdaryldy. Aımaq basshysy kóktemgi sý tasqyny eń jaýapty kezeńderdiń biri ekenin atap ótti.
«Bizdiń birlesken mindetimiz - adamdardy qorǵaý jáne shyǵyndy azaıtý, sonyń ishinde aldyn alý sharalary. Turǵyndarmen túsindirý jumystaryn júrgizý, olardy jaǵdaıdyń ózgerýi boıynsha jedel habardar etý qajet. Turǵyndar óz múlkin qorǵaý boıynsha aldyn ala sharalar qabyldaýy, aýla aýmaqtary men sý buratyn aryqtardy tazartýy mańyzdy», - dedi Marat Ahmetjanov.
Oblys ákimdiginiń baspasóz qyzmeti málim etkendeı, qazirgi kezde oblys boıynsha gıdrometeorologııalyq jaǵdaı turaqty. Sý tasqynyna qarsy aldyn alý sharalary oryndalýda. Eldi mekenderden 2 mln tekshe metr qar shyǵaryldy. Otyn, ınertti materıaldar men qum salynǵan qaptar daıyndaldy. Avtomobıl jáne temirjol boıynda ornalasqan 2500-ge jýyq sý ótkizý qurylystary men 490 kópir tazartyldy. Jalpy 12 myńnan astam adamǵa arnalǵan 268 evakýatsııalaý pýnkti ázirlendi. Ózenderdiń sý tasqyny qaýpi bar ýchaskelerinde muzdy qopsytý jáne usaqtaý boıynsha jarylys jumystary aıaqtaldy. Oblys ózenderindegi muz keptelisterin joıý boıynsha jumystar júrgizý josparlanýda.
Azamattyq qorǵaý qurylymdary men qyzmetteri kúsheıtilgen jumys rejımine aýystyryldy, sý tasqynyna qarsy oblystyq jedel shtab jumys isteýde, osyndaı shtabtar aýdandar da uıymdastyryldy.
Aıta ketsek, budan buryn Kókshetaýda mekteptiń jertólesin sý basyp qalǵanyn jazǵan edik.