Aqmola oblysynda bir top til janashyry marapattaldy
Shahmet Qusaıynov atyndaǵy qazaq mýzykalyq-drama teatrynda uıymdastyrylǵan shara barysynda oblystaǵy tilderdi oqytý ortalyqtary oqytýshylarynyń úzdik oqytý ádistemeleri jınaqtalǵan ınteraktıvti kórme kópshilik nazaryna usynyldy.
Іs-sharada Aqmola oblysy ishki saıasat basqarmasynyń basshysy Almas Alın jınalǵandardy oblys ákiminiń atynan tilder kúnimen quttyqtap, tildiń ulttyń uly qazynasy, halyqtyń rýhanı qýatynyń negizi ekenin atap ótti.
«Búgin qazaq álipbıiniń negizin qalaýshy, aǵartýshy jáne qazaq tili muǵalimi Ahmet Baıtursynovtyń týǵan kúnine oraılastyrylǵan úlken is-shara ótkizip otyrmyz. Til – halyqtyń baılyǵy jáne qazaqstandyqtardyń rýhanı qundylyǵy. Bizdiń halqymyz kóptegen synaqtan ótti, biraq ana tili men patrıotızm qundylyqtaryn eshqashan joǵaltqan emes. Til – Táýelsiz Qazaqstannyń sımvoly. Memleket basshysy Ulttyq quryltaıda sóılegen sózinde memlekettik tildi qoldanýdy arttyrý memlekettik saıasattyń basym baǵyttarynyń biri ekenin atap ótti. Bizdiń óńirde osy baǵytta keshendi jumystar qolǵa alynǵan, jyl saıyn tildi meńgerip, jumys pen turmysta keńinen qoldanatyndar sany artyp keledi. Qazaq tili bıznestiń, bilimniń jáne ǵylymynyń ajyramas bóligi sanalady. Aqmola oblysynda memlekettik tildi nasıhattaýǵa baǵyttalǵan jumystar jaqsy nátıje berip otyr. Til otbasynan jáne balabaqshadan bastalady, osy jyly memlekettik tilde mektepke deıingi bilim alatyn balalardyń sany 70 paıyzǵa ósti. Sonymen qatar oblystyń birinshi synyp oqýshylarynyń 52 paıyzy qazaq tilinde bilim alady», - dedi Almas Alın.
Basqarma basshysynyń aıtýynsha, osy kúni oblys aýdandarynda tilderdi oqytý boıynsha ádistemelik ortalyqtarda keshendi jumystar júrgizilip jatyr. Keıingi 3 jylda tildik kýrstarda tyńdaýshylar sany 52 paıyzǵa ósti, bul aqmolalyqtardyń tilge degen qyzyǵýshylyǵynyń artyp kele jatqandyǵyn kórsetedi. Sondaı-aq jas urpaqqa patrıottyq tárbıe berýge, til saıasatyna baǵyttalǵan is-sharalar da ótkizilip turady. Máselen, osy jyldyń mamyr aıynda qazaq tili men ádebıeti muǵalimderiniń úlken forýmy ótti, onda oblystyń barlyq ustazy tájirıbe almasyp, til úırenýdiń damýyna kedergi keltiretin ózekti máselelerdi talqylady. Maýsym aıynda memlekettik til deńgeıin arttyrýǵa arnalǵan respýblıkalyq semınar ótti. Dástúrli baıqaýlardan basqa, tildiń damýyna úles qosatyn oblystyń qarapaıym turǵyndary úshin de baıqaýlar ótkizilip keledi.
Saltanatty kesh sońynda tildiń damýyna zor úles qosqan pedagogtar, memlekettik qyzmetshiler jáne ózge de salalardyń mamandary, sondaı-aq 10 atalym boıynsha anyqtalǵan Aqmola oblysy ákiminiń «Til janashyry» arnaıy syılyǵynyń ıegerleri marapattaldy.
Aqmola oblysy ishki saıasat basqarmasynan atap ótkendeı, búgingi tańda óńirde til saıasatyn damytýǵa baǵyttalǵan 2 000-nan astam is-shara ótkizilgen. Bul baǵyttaǵy jumystary odan ári jalǵasyn tabady.
Aıta ketsek, budan buryn Aqmola oblysynda «Jaıly mektep» jobasy qalaı júzege asyrylyp jatqanyn jazǵan edik.