Aqmola oblysynda bir top kitaphanashy marapattaldy
Merekelik is-sharaǵa oblystyń 17 aýdany men 3 qalasynan kitaphanashylar qatysty. Onda kitaphana isiniń damýyna qosqan zor úlesi men jeke eńbek jáne shyǵarmashalyq úlesi úshin oblys kitaphanashylary Aqmola oblysy ákiminiń orynbasary Altynaı Ámirenovanyń alǵys hatymen marapattaldy.
«Kitaphanashy mamandyǵynyń ımıdjin kóterý jáne ony kásibı arenada yntalandyrý maqsatynda kúni keshe Qazaqstan Respýblıkasy Úkimetiniń «24 qazan – Kitaphanashylar kúni» jańa kásibı merekesin jarııalaýy búginde ǵasyrǵa jýyq tarıhy bar bilimniń, elimizdi, egemendigimizdi tanytatyn rýhanı orda qyzmetkerleri – kitaphanashylarǵa memleket tarapynan kórsetiletin úlken qurmettiń belgisi. Bul – tek kásibı kitaphanashylardyń ǵana emes, eń aldymen kitapty jaqsy kóretin kitaphanashynyń mádenı jáne qoǵamdyq ómirindegi orasan zor rólin túsinetin adamdardyń merekesi. Sizderge ǵylymı jáne aǵaptyshylyq qyzmeti jolynda halyqty mádenı tápbıeleý, rýhty urpaq ósirýge yqpal etip, Otanymyzdyń baı ári kórnekti mádenı qundylyqtaryn damytýdaǵy eseli eńbekterińiz úshin shynaıy alǵys bildiremin», – dedi quttyqtaý sózinde Aqmola oblysy Mádenıet basqarmasynyń basshysy Aıgúl Sábıtova.
Sonymen birge, Mádenıet qaıratkeri, kitaphana salasynyń úzdigi Altyn Jaǵyparova, M.Jumabaev atyndaǵy Aqmola oblystyq ámbebap ǵylymı kitaphanasynyń dırektory Qýanysh Ospanov jáne Mádenıet, sport, týrızm jáne aqparat qyzmetkerleriniń salalyq kásipodaqtar federatsııasynyń Aqmola oblysy boıynsha fılıalynyń tóraǵasy Dımash Shalabaev quttyqtaý sózin arnady.
Jas kitaphanashylar Nurlan Qystaýbaev, Jánel Nazybaeva, Almas Nurmash, Oralbek Núrish qazaqtyń uly aqyndary Maǵjan Jumabaev, Muqaǵalı Maqataev, Abaı Qunanbaev shyǵarmalarynan úzindi oqydy.
Merekelik is-shara Úkili Ybyraı atyndaǵy Aqmola oblystyq fılarmonııasynyń solısteri Janar Saqtaǵanova, Lázzat Ydrysova, Dmıtrıı Petıýl, estrada juldyzy Jańartý Bekmurat, Respýblıkalyq baıqaýlarynyń laýreaty Ermek Qasym jáne Baýyrjan Nurymbetovtiń oryndaýyndaǵy kontserttik baǵdarlamaǵa ulasty.
Aıta ketsek, budan buryn Respýblıka kúnine oraı Kókshetaýda 65 otbasy jańa páter kiltin alǵanyn jazǵan edik.