Aqmola oblysynda aýdan ákimi men basqarma basshysy qatań sógis aldy

<p>KÓKShETAÝ. KAZINFORM - Aqmola oblysynda Bulandy aýdanynyń ákimi Ardaq Smaıylov pen oblystyq qurylys, sáýlet jáne qala qurylysy basqarmasynyń basshysy Marat Áýbákirov qatań sógis túrinde tártiptik jaýapqa tartyldy.</p>

Aqmola oblysy ákimdigi baspasóz qyzmetiniń málimetinshe, aýdan ákim sý tasqynynyń saldaryn joıý boıynsha jumysty tıisti deńgeıde uıymdastyrmaǵany úshin jaýapqa tartylyp otyr.

«Kóktemgi sý tasqynynyń saldaryn joıý jónindegi is-sharalardy ýaqytyly oryndamaǵany, sondaı-aq sý tasqynynan zardap shekken azamattardyń sapasyz tizimderin qurastyrǵany úshin Aqmola oblysy ákiminiń ókimimen Bulandy aýdanynyń ákimi Ardaq Smaıylov qatań sógis túrindegi tártiptik jazaǵa tartyldy», - dedi vedomstvodan.

Sonymen birge, Jarqaıyń, Bulandy aýdandarynda sý tasqynynan zardap shekken turǵyndarǵa úı jáne Tselınograd, Birjan sal, Bulandy, Sandyqtaý aýdandary men Stepnogorsk qalasynyń Bestóbe kentinde mektep qurylysynyń kesteden keshigýine sebepker Aqmola oblysy Qurylys, sáýlet jáne qala qurylysy basqarmasynyń basshysy Marat Áýbákirovke de qatań sógis jarııalandy.

Aıta ketsek, budan buryn Aqmola oblysynda jumysyna salǵyrt qaraǵan eki aýdannyń ákimine qatań sógis jarııalanǵanyn jazǵan edik.