Aqmola oblysynda Asqar Zabıkýlınge arnalǵan mýral paıda boldy

<p>Qutqarýshylar kúni merekesi qarsańynda Stepnogor qalasynda Asqar Zabıkýlınge arnalǵan jańa mýral paıda boldy, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform</a>&nbsp;Aqmola oblysy Tótenshe jaǵdaılar departamentine silteme jasap.</p>

Vedomstvonyń baspasóz qyzmetinen málim etkendeı, ótken jyldyń qarasha aıynda óz ómirin qaterge tigip, adamdardy qutqarý kezinde qaza tapqan elordalyq órt sóndirýshi Asqar Zabıkýlın beınelengen art-obekt Stepnogor qalalyq 3-MÓSB ǵımaratynyń aldyńǵy jaǵynda ornalasqan.

Batyr-qutqarýshynyń portretin Stepnogor qalalyq Tótenshe jaǵdaılar basqarmasynyń jáne jergilikti atqarýshy organdardyń bastamasy boıynsha Almatylyq «AW_borders» kompanııasy oryndaǵan. Sýretshi Abylaıhan Súleımenovtyń jumysyna 10 kúndeı ýaqyt ketken.

Stepnogor qalalyq Tótenshe jaǵdaılar basqarmasynyń bastyǵy Erjan Qappasovtyń aıtýynsha, mýral batyrdy eske alý úshin jáne arnaıy kásibı mereke, 19 qazan – Qutqarýshylar kúnine oraılastyryp otyr.

«Asqardyń erligin búkil Qazaqstan biledi. Bul mýral – bizge, sondaı-aq onyń qyzdaryna qalǵan muralardyń biri bolyp tabylady. Onyń erligin umytpaǵandaryńyz úshin kóp rahmet jáne de qoldaý kórsetkenderi úshin qala ákimdigine alǵysymdy bildiremin», – dedi Asqardyń aǵasy Eldar Zabıkýlın.

Aıta ketsek, budan buryn Astanada erlikpen qaza tapqan órt sóndirýshi Asqar Zabıkýlın týraly serıal túsirilip jatqandyǵyn jazǵan edik.