Aqmola oblysynda 4 adamnyń brýtsellez juqtyrǵany anyqtaldy
Aqmola oblysy boıynsha sanıtarlyq-epıdemıologııalyq baqylaý departameniń málimetinshe, 2024 jyldyń jeti aıynda aqmolalyqtar arasynda qutyrý, sibir jarasy, Kongo-Qyrym gemorragııalyq qyzbasy, týlıaremııa epıdemıologııalyq aýrýlary tirkelgen joq. Alaıda, osy kezeńde oblysta adamdar arasynda brýtsellezdiń juqtyrýdyń deregi tirkeldi.
«Aqmola oblysynyń turǵyndary arasynda jyl basynan beri brýtsellez juqtyrýdyń tórt jaǵdaıy anyqtaldy. Alaıda, bul ótken jyldyń (byltyr jeti adamnyń shaldyqty) sáıkes kezeńimen salystyrǵanda birshama tómen. Brýtsellezben syrqattanýshylyq Bulandy, Astrahan, Tselınograd aýdandarynda jáne Kókshetaý qalasynda tirkeldi. Barlyq naýqastar 14 jastan asqan. Eki jaǵdaıda ınfektsııa kózi iri qara malda boldy, qalǵan ekeýinde ınfektsııa kózderi anyqtalmady. Sonymen birge, baılanysta bolǵan 12 adam anyqtaldy, serologııalyq ádispen brýtsellezge tekserildi, oń nátıje anyqtalǵan joq», — dedi Aqmola oblysy Bas memlekettik sanıtarlyq dárigeriniń orynbasary Serik Omarhanov.
Aıtýynsha, ınfektsııa oshaqtarynda mal sharýashylyǵy ónimderine zerthanalyq baqylaý júrgizilip jatyr.
Aıta ketsek, budan buryn Aqmola oblysynda jyl basynan beri 268 adamdy kene shaqqanyn jazǵan edik.