Aqmola oblysynda 25 tonna bıdaı urlaǵandar ustaldy

<p>Aqmola oblystyq polıtsııa departamenti qyzmetkerleri 25 tonna bıdaı urlyǵynyń jolyn kesti, dep habarlaıdy <a href="QazAqparat" target="_blank" rel="noopener">QazAqparat </a><a href="https://polisia.kz/aqmola-oblystyq-pd-uqqkb-qyzmetkerleri-25-tonna-bidaj-urlyghynyng-zholyn-kesti/" target="_blank" rel="noopener">Polisia.kz</a>-ke silteme jasap.</p>

 Uıymdasqan qylmysqa qarsy kúres basqarmasynyń qyzmetkerlerine jumys barysynda Bulandy aýdanynyń aýmaǵynda úlken kólemde astyq urlanyp jatqany týraly aqparat kelip túsken. Jedel ýákilder birden aınalma jáne dalalyq joldardy pysyqtap, aýyl sharýashylyǵy ónimderin tasymaldaıtyn júrgizýshilerden ilespe qujattardy tekserýden bastady.

Nátıjesinde polıtseıler tıisti qujattarsyz 25 tonna bıdaı tasymaldaǵan KAMAZ avtokóligin toqtatty. Avtokólikti tekserý barysynda quqyq qorǵaý organdary 49 jastaǵy júrgizýshiden tirkelmegen travmatıkalyq qarýdy anyqtady.

Barlyq mán-jaılardy anyqtaý barysynda júk kóligi bar júrgizýshini jergilikti JShS-niń biriniń 36 jastaǵy agronomy jaldaǵany belgili boldy, ony keıinirek polıtsııa qyzmetkerleri anyqtady. Al JShS dırektory kásiporynda ne bolyp jatqanyn, urlyq jasalǵanyn bilmegen.

Atalǵan faktilerge qatysty polıtseıler QR QK-niń 188-baby (Urlyq) boıynsha sotqa deıingi is júrgizýdi bastady. Sondaı-aq qarýdy alyp júrý faktisine qatysty QR QK-niń 287-baby (Qarýdy, oq-dárilerdi, jarylǵysh zattar men jarylǵysh qurylǵylardy zańsyz satyp alý, berý, ótkizý, saqtaý, tasymaldaý nemese alyp júrý) boıynsha qylmystyq is bastaldy.

Aıta ketý kerek, Aqmola oblysynyń polıtsııasynda egin jınaý naýqanyna baılanysty árbir qylmys erekshe baqylaýda.