Aqmola oblysynda 11 synyp oqýshysy sabaqqa barmaı shahtadan altyn izdegen

<p>KÓKShETAÝ. KAZINFORM &mdash; Aqmola oblysynda joǵalǵan 17 jastaǵy jasóspirim Bestóbe shahtasynan tabyldy.</p>

Aqmola oblysy PD baspasóz qyzmetiniń málimetinshe, 16 qyrkúıekte Stepnogor qalalyq polıtsııa basqarmasyna 17 jastaǵy jasóspirimniń joǵalǵandyǵy týraly habar túsken.

11-synyp oqýshysynyń sabaqty sebepsiz bosatqanyna muǵalimder dabyl qaqqan.

«Oqýshy 13 qyrkúıekten beri mektepke barmaǵan. Jedel izdestirý sharasy barysynda joǵalǵan jasóspirimniń ata-anasy, jaqyn týystary men tanystary, dostary anyqtalyp, surastyryldy. Nátıjesinde jasóspirimniń Bestóbe kenti aýmaǵyndaǵy shahtaǵa túskeni anyqtaldy. Bala shahtadan shyǵarylyp, týystaryna aman-esen tapsyryldy», — dedi vedomstvodan.

Balanyń sózinshe, ol shahtaǵa altyn izdeýge túsken.

«Polıtsııa jasóspirimniń ata-anasyna qatysty kámeletke tolmaǵandy tárbıeleý, onyń quqyqtary men múddelerin qorǵaý jónindegi mindetterdi, sondaı-aq onyń qaýipsizdigin qamtamasyz etý jónindegi sharalardy oryndamaǵany úshin ákimshilik hattama toltyrdy. Sonymen qatar, kámeletke tolmaǵan balanyń ózi qorǵalatyn obektige zańsyz kirgeni úshin ákimshilik jaýapqa tartyldy», — dedi vedomstvodan.

Osy rette, tártip saqshylary ata-analardy balalarynyń ornalasqan jerin baqylaýdy jáne qaýipsizdik máselesin jiti nazarda ustaý qajettigin eske salady.

Aıta ketsek, budan buryn Aqmola oblysynda 462 mektepte qaýipsizdik sabaǵy ótkenin jazǵan edik.