Aqmola oblysynda 1 jastan asqan bala terezeden qulap ketti

<p>KÓKShETAÝ. KAZINFORM - Aqmola oblysynda 1 jastan asqan bala 4-qabattyń terezesinen qulap ketti. Tártip saqshylary ata-analardy balalarǵa baqylaýdy kúsheıtýge jáne qaraýsyz qaldyrmaýǵa shaqyrady.</p>

Aqmola oblysy PD baspasóz qyzmetiniń málimetinshe, keleńsiz jaǵdaı 24 shildede Şýche qalasynda boldy.

«Jyl basynan beri oblys aýmaǵynda balalardyń terezeden qulap ketýdiń 10 deregi tirkeldi. Onyń biri - 24 shildede Şýche qalasynda boldy. Onda bir jastan asqan qyz bala 4-qabattaǵy terezeden qulap, zardap shekti», - dedi vedomstvodan.

Osy rette, polıtsııa qyzmetkerleri ata-analarǵa kámeletke tolmaǵan balalardy baqylaýdy kúsheıtýge jáne qarasýyz qaldyrmaýǵa shaqyrady.

Sonymen birge, 2024 jylǵy 16 maýsymnan bastap «Qazaqstan Respýblıkasynyń Ákimshilik quqyq buzýshylyq týraly kodeksine áıelder quqyqtary men balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» Zań kúshine engenin eske salady.

Osy Zańǵa sáıkes kámeletke tolmaǵan balalardyń qaýipsizdigin qamtamasyz etý jónindegi sharalardy oryndamaǵany úshin ata-analardyń nemese basqa da zańdy ókilderdiń jaýapkershiligi engizilip otyr.

Aıta ketsek, budan buryn Qosshyda 6 jasar bala tórtinshi qabattyń terezesinen qulap ketkenin jazǵan edik.