Aqmola oblysy: tóbelesken ákim orynbasary men apparat basshysy aıyppulmen qutyldy

<p>KÓKShETAÝ. KAZINFORM - Aqmola oblysynda tóbelesken Shortandy aýdany ákiminiń orynbasary men apparat basshysy jazaǵa tartyldy. Sot úkimimen ekeýine de 55 380 teńge mólsherinde aıyppul salyndy.&nbsp;</p>

Aqmola oblysy sotynyń baspasóz qyzmetiniń málimetinshi, Shortandy aýdandyq sotynda aýdan ákiminiń orynbasary «A.» jáne apparat basshysy «B.» bir-birine qasaqana jeńil zııan keltirgeni úshin ákimshilik quqyq buzýshylyq týraly ister qaraldy.

2024 jyldyń mamyr aıynda «A.» men «B.» ákimdik ǵımaratynda ózara sózge kelip, sońy tóbeleske ulasqan. Sarapshynyń qorytyndysyna sáıkes, olar bir-birine jeńil zııan keltirgen. Sotta ekeýide óz kinásin moıyndaǵan joq.

«Sot qaýlysymen aýdan ákiminiń orynbasary «A.» jáne apparat basshysy «B.» Ákimshilik quqyq buzýshylyq týraly kodekstiń 73-1-babynyń 1-tarmaǵy boıynsha (quqyq buzýshylyq jasalǵan sáttegi redaktsııasynda) ákimshilik quqyq buzýshylyq jasaǵany úshin kináli dep tanyldy jáne olardyń árqaısysyna 55 380 teńge mólsherinde aıyppul túrinde ákimshilik jaza qoldanyldy», - dep túsindirdi sottyń baspasóz qyzmetinen.

Sot qaýlylary zańdy kúshine engen joq.

Aıta ketsek, budan buryn Kókshetaýda qyzmetshisin zorlaǵan kóńil kóterý ortalyǵynyń dırektoryna qatysty is qozǵalǵanyn jazǵan edik.