Aqmola murajaıynda landshaft nusqadaǵy ekspozıtsııa ashyldy
Jańa ekspozıtsııa ólkeniń tarıhy men mádenıetin ashady. Onda tabıǵat zaly, ekojúıelerdi qoldana otyryp, landshaft kórsetý ádisine sáıkes jasalǵan. «Tabıǵı tarıh» zaly Jerdegi ómirdiń damý kezeńderin, ejelgi dáýirdegi ósimdikter men janýarlar álemi týraly materıaldardy usynady.
«Uly dala órkenıeti» zalynyń «Arheologııa», «Orta ǵasyr», «Etnografııa», «Abylaı han» bólimderi qazaq halqyn Kóshpeli órkenıettiń ókili retinde tanystyrady. Óıtkeni, Uly dala álemge jylqy sharýashylyǵy men salt at mádenıetin syılady, munda etnos ómiri, onyń sharýashylyq-mádenı ádet-ǵuryptary, ólke arheologııasy men etnografııasy boıynsha úzdik kollektsııalar usynylady.
«Qazaq tarıhyndaǵy altyn ǵasyr - Abylaı han bıligine arnalǵan ekspozıtsııa erekshe oryn alady. «XIX ǵasyrdaǵy Aqmola ólkesiniń tarıhy» zaly XIX ǵasyrdaǵy ólkeniń áleýmettik-ekonomıkalyq jáne saıası ómirin, sondaı-aq Kókshetaý jáne Aqmola qalalarynyń paıda bolýyn kórsetedi. «Aqmola oblysynyń XX ǵasyrdaǵy tarıhy» zaly Aqmola oblysynyń tarıhynda kórinis tapqan jarqyn, keıde dramalyq oqıǵalarǵa toly XX júzjyldyqtyń mańyzdy tarıhı oqıǵalaryna arnalǵan. 2018 jyly ashylǵan «Elbasy jáne Táýelsizdik» zamanaýı tarıh zaly Táýelsiz Qazaqstannyń qalyptasý tarıhyn, onyń jetistikterin jáne tabysty Qazaqstannyń qurylýyndaǵy Tuńǵysh Prezıdenttiń aýqymdy tarıhı rólin kórsetedi», delingen habarlamada.
Jańa ınnovatsııalyq tehnologııalardy qoldana otyryp qurylǵan jańa ekspozıtsııalyq zaldarda jádigerlerdi (sóreler, dıoramalar, ınstallıatsııalar) dástúrli kórsetýmen qatar kelýshilerdiń yńǵaılylyǵy úshin monıtorlar, sensor monobloktar jumys isteıtin bolady, sondaı-aq mýzeıde alǵash ret QR kodtar ornatylǵan.