Aqmola men Pavlodardyń polıtseıleri jol boıynda júr

KÓKShETAÝ. QazAqparat - Aqmola oblysynyń polıtseıleri aýa raıynyń qolaısyzdyǵyna baılanysty jol boıyndaǵy kólikterdiń júrisin baqylap júr, dep habarlaıdy QazAqparat.

22 qazanda keıbir jol ýchaskelerinde kóliktiń barlyq túrleri úshin jol qozǵalysy jabyldy. Alaıda, eskertýlerge qaramastan tranzıtpen kele jatqan kólik ıeleri jolda turyp qaldy.

Aqmola polıtseıleri oblys ortalyǵynan túrli baǵyttardaǵy avtokólikterdiń baǵandaryn súıemeldep, kólik quraldarynyń júrgizýshilerine túsindirý jumystaryn júrgizýde. 250-den astam kólikten turatyn baǵan qurǵan patrýldik polıtsııanyń 3 ekıpajy avtokólikterdi elorda baǵytyna jetýge járdemdesip jatyr.

«23 qazan, qatty kóktaıǵaq. Şýchınsk qalasy baǵytynda baǵan qalyptastyrýdamyz. 200 kóliktiń 150-ge jýyǵy jazǵy shınalarmen júr. Kóbinese tranzıtshiler», - dep atap ótti Aqmola oblysy PD jergilikti polıtsııa qyzmeti basqarmasynyń bastyǵy Aslan Qyzbıkenov.

Sol sııaqty, Pavlodar oblysynda da aýa raıynyń nasharlaýyna baılanysty quzyrly vedomstvo jol qozǵalysynyń barlyq qatysýshylaryn jol qozǵalysy erejelerin qatań saqtaýǵa, jyldamdyq pen qashyqtyqty buzbaýǵa, tek tehnıkalyq jaramdy kólikpen júrýge shaqyrdy.

Ashyq kózderden alynǵan foto