Aqmola arhıvinde repressııaǵa ushyraǵandardyń 60 myńǵa jýyq qujaty saqtaýly

KÓKShETAÝ. QazAqparat - 2019 jyldan bastap Aqmola oblysy Polıtsııa departamentiniń Aqparattyq taldaý ortalyǵynyń (ATO) arnaıy memlekettik arhıvine 136 ótinim men suraý kelip túsken. Atalmysh arhıvte repressııaǵa ushyraǵandar men aqtalǵandar týraly barlyq málimetter saqtaýly tur, dep habarlaıdy QazAqparat tilshisi.

Oblystyq Polıtsııa departamentiniń baspasóz qyzmetinen habarlaǵandaı, qazirgi tańda arhıvte 59 644 málimeti bar 14 qor qurylǵan. Kóne qujattar barynsha júıeli túrde saqtaýly.

«Mamandandyrylǵan arhıv qyzmetkerleri azamattarǵa arhıv anyqtamalaryn, qylmystyq ister boıynsha qujattardyń kóshirmesin alýǵa kómektesedi. Árbir arhıv anyqtamasynda anketalyq málimetter, aıyptaý mazmuny, úkim men aqtalý protsesteri jaıly málimetter bar. Jalpy, 2019 jyldan bastap arhıvke 136 ótinim men suraý kelip tústi. Kelip túsken ótinimder boıynsha 40 memlekettik qyzmet kórsetilip, 29 arhıv anyqtamasy, buıryqtardan 8 úzindi tapsyrylyp, úsh qujattyń kóshirmesi suralǵan», - delingen vedomstvoda.

Kóp jaǵdaıda qýǵynǵa ushyraǵandardyń týystary arhıv anyqtamasyn alyp, qylmystyq istermen tanysqysy kelgenimen aqtalǵandarmen týys ekenin rastaı aoatyn qujattardy alyp kele almaı jatady.

«Mundaı jaǵdaıda ótinim toltyryp, jeke kýáligin ákelse bolǵany. Sebebi, kóp jaǵdaıda kezinde sottalǵandar men olarǵa suraý salyp júrgenderdiń tegi birdeı bolyp shyǵady. Sondaı-aq, arhıv azamattardyń ótinimin turǵylyqty mekeni men azamattyǵyna qaramaı qanaǵattandyra alady. Máselen, arhıvke kelip túsken ótinimderdiń biri sonaý Atyraýdan joldanǵan. Týystary Vınıts oblysynyń týmasy Ivan Nadıvaıkoǵa qatysty málimetterdi izdestirgen. Ol bolsa kezinde Zerendi aýdanynyń Aıdabol aýylynda turypty», - dep habarlaıd Polıtsııa departamentiniń baspasóz qyzmetinen.

Jaýap alý hattamalary men kýágerlerdiń jaýaby áli kúnge deıin qupııa túrde saqtalyp keledi. Aqtalǵandardyń týystary tek protsessýaldyq sıpatqa ıe emes qujattarmen tanysa alady.

Repressııaǵa kezinde halyqtyń belgili bir sanaty ǵana emes, bir halyq pen etnostyq toptar da ushyrap, Qazaqstanǵa kúshtep kóshirilgen. Qýǵyndalǵandardyń quramynyń ár túrli ulttar bolǵan.

«Arhıvke polıak Bronıslav Tsybýhtyń týystary keldi. 1936 jyly ol «jat element» retinde Qazaqstanǵa jer aýdarylǵan. Oǵan deıin Keller aýdany Glýbokoe aýylynda turǵan. Óziniń páterinde ol azamat adamdar tobyn jınap, aýyldan Ýkraınaǵa qashý josparyn qurǵan, «antısovettik» úgit júrgizgen. Arhıvtiń arqasynda ol ksi týraly birshama málimetke qol jetkizildi», - delingen habarlamada.

Polıtsııanyń baspasóz qyzmetinen habarlaǵandaı, arhıvke suraý kóbinese TMD elderinen túsýde.


Avtory Oksana Matasova