Aqmola, Aqtóbe oblystarynda tasqynnyń qaýipti kezeńi aıaqtaldy — mınıstrlik

<p>ASTANA. KAZINFORM — Sý resýrstary jáne ırrıgatsııa mınıstrliginiń resmı ókili Móldir Ábdýalıeva ortalyq kommýnıkatsııalar qyzmetinde ótip jatqan brıfıngide eldegi sý qoımalaryndaǵy ahýaldy baıandady.</p>

«Aqmola oblysyndaǵy eki iri sý qoımasy orta eseppen 99%-ǵa toly, eki nysan da tranzıttik rejımde jumys istep jatyr. Óńirde sý tasqynynyń qaýipti kezeńi ótti. Aqtóbe oblysyndaǵy eki iri sý qoımasyna 99% sý jınaldy. Bul nysandar da tranzıttik rejımde jumys istep jatyr, sý aǵynynyń tómendeýi baıqalady. Sý tasqynynyń belsendi kezeńi aıaqtaldy», — dedi ol.

Resmı ókil Shyǵys Qazaqstan oblysyndaǵy bes iri sý qoımasy orta eseppen 62%-ǵa tolǵanyn atap ótti.

«Olardyń bári shtattyq kestege saı jumys istep jatyr. Osy aptada sý tasqynynyń belsendi kezeńi bastalady dep kútilýde. Batys Qazaqstan oblysynda 4 iri sý qoımasy orta eseppen 65%-ǵa toldy. Olar da shtattyq keste boıynsha jumys isteıdi. Óńirde Shaǵan ózeniniń deńgeıi áli de artyp keledi. Búginde Shaǵan sý qoımasyna kirip jatqan aǵynnyń jyldamdyǵy sekýndyna 690 tekshe metr. Jaıyq ózeni boıynsha sý tasqynynyń ekinshi tolqyny kútilýde. Reseıdiń jedel málimetteri boıynsha, Irıklın sý torabynan sý jiberý keshegi deńgeıde qalyp otyr — sekýndyna 1680 tekshe metr. Bul sý Qazaqstan shekarasyna 15-20 kúnde jetýi múmkin. Sondyqtan sý tasqynynyń aldyn alý úshin mınıstrlik pen Batys Qazaqstan jáne Atyraý oblystary ákimdikteriniń qyzmetkerleri ózen arnalaryn muzdan tazartyp, keptelistiń aldyn alý jumysyn atqaryp jatyr», — dedi Móldir Ábdýalıeva.