Aqmola ákimi jýrnalıster úshin gıd qyzmetin atqardy
Şýche-Býrabaı kýrortynyń basty PR menedjeri retinde Málik Myrzalın jýrnalıster mingen avtobýsta «Býrabaıǵa qosh keldińizder, búgin oblys ákimi qyzmetinen bólek, sizderge arnalǵan saıahatta ózim jetekshilik etemin», - dep bastady sózin oblys basshysy.
«Sizderge týrızmdi damytýda qandaı jumystar jasalynyp jatyr, bolashaqqa qandaı josparlar baryn aıtyp, kórsetkimiz keledi. Árıne problemada joq emes, ol problemalardy biz bilemiz», - dep tolyqtyrdy óz sózin.
Onyń aıtýynsha, Býrabaı kentinde aýmaǵy 14 ga jerdi qamtıtyn jańa móltekaýdan qurylysy bastaldy, sonymen qatar kenttiń ortalyq alańy men kóshelerinde jóndeý jumystary júrgizilip, jańadan 2 alleıa salyndy jáne qaldyqtardy suryptaıtyn zamanaýı konteınerler qoıyldy.
«Ortalyq kóshelerde jaıaý júrginshilerge arnalǵan jol belgileri salyndy, buryn bolmaǵan, sonyń áserinen jolda oqys oqıǵalar jıi oryn alatyn, qazir aıtarlyqtaı tyıyldy, bul aldymen qaýipsizdiktiń qamtamasyz etilýi», - dedi óńir basshysy.
Gıd aldymen ortalyq alań jáne týrıstik ortalyqpen tanystyrdy. Onda ólketaný jáne tabıǵat mýzeıi, haıýanattar saıabaǵy men haıýanattardy tamashalaý buryshy, kádesyı dúkenderi, oıyn-saýyq ortalyqtary ornalasqan.
Sol sııaqty týrısterge arnalǵan tegin jol kartasy men termınal qarastyrylǵan. «Bolashaqta haıýanattar saıabaǵyn safarı-saıabaq retinde aıasyn keńeıtý josparda bar», - dep tolyqtyrdy oblys ákimi.
Odan ári saıahat kól jaǵalaýyna qaraı jalǵasty. Kól jaǵasyna aǵylshyn ınvestorlary 10 sý syrǵanaqtan turatyn tóbeshikten turatyn ústi jabyq akvasaıabaq salýda. Quny 200 mln teńgeni quraıtyn akvasaıabaqty 2019 jyly aıaqtalady dep kózdelip otyr.
«Kelisim ońaıǵa túspedi, sebebi ınvestorlar ashyq aspan asty akvasaıabaǵyn turǵyzǵysy keldi, al bizge týrıster úshin akvasaıabaqtyń jyl boıy jumys istegeni tıimdi», - dedi M.Myrzalın.
Sóz arasynda aımaq basshysy kól jaǵalaýynda tegin jáne aqyly jaǵajaılardyń baryn aıtyp, baǵasy 500 teńgeden bastalatynyn jáne onyń ishine birneshe qyzmet túriniń kiretinin tilge tıek etti.
Odan ári ákim jýrnalısterge serýen retinde Bólektaýdyń bıik jerine shyǵýdy usyndy. Taýdyń bıik tusynan jaıaý shyqqan jýrnalıster Býrabaıdyń eń ǵajaıyp kórinisin tamashalaýǵa múmkindik aldy.
Saıahat sońy Býrabaıdaǵy 4 juldyzdy «Park House» qonaq úıiniń aspan asty terrasasynda Býrabaıda týrızmdi damytýda júzege asyrylatyn basty jobalardy tanystyrýǵa arnalǵan baspasóz máslıhatyna ulasty.
Aıta ketý kerek, oblys ákimi saıahat barysynda kýrortty aımaqtaǵy ýaqyt sozbaı sheshimin tabýy tıis birqatar problemalarǵada toqtalyp ótti. Sonyń biri ájethana máselesi «Kóbisi ákim bundaı usaq-túıek máselemen aınalyspaýy tıis dep synap jatady. Men ol oımen kelispeımin, kerisinshe aınalysýy kerek», - dedi ákim.
Aqmola basshysy ájethana máselesin beker kótermedi, sebebi halyq arasynda jáne áleýmettik jelilerde jıi qozǵalatyn taqyryp. Ásirese «Astana-Býrabaı» tasjoly boıyndaǵy ájethanalar máselesi kúni búginge deıin synǵa ushyrap keldi. Búginde tasjol boıynda «QazAvtoJol» ulttyq kompanııasynyń respýblıkalyq jobasy aıasynda salynǵan «Kazway» pavılony iske qosylǵan. Onyń ishinde dámhana, dúken, ájethana, telefon qýattaıtyn qurylǵy, wi-fi, avtoturaq, basqada jolaýshyǵa qajettiniń bári bar. Bir pavılonnyń quny 22 mln teńgeni quraıdy jáne ol shaǵyn kásipkerlerge jalǵa berilýde. Aqmola oblysy boıynsha 6 pavılon bar, onyń 4-i tasjol boıynda, 2-i Býrabaı kýrortynda ornalasqan. Budan bólek Býrabaıdyń ózinde eýropalyq standartqa saı, vandaldardan qorǵaý modýli bar zamanaýı úsh ájethana qoıyldy, aldaǵy ýaqytta olardyń sanyn 11-ge jetkizý qarastyrylýda.
Buǵan deıin aıtqanymyzdaı baspasóz týry barysynda oblys ákimi halyq arasynda jıi aıtylyp júrgen Býrabaıda demalý Túrkııamen salystyrǵanda nege qymbat degen jýrnalısterdiń suraǵyna túsinikteme bergen bolatyn.
Sonymen qatar, aımaq basshysy jumys babymen Býrabaıǵa jıi kelgenimen demalýdyń sáti túse bermeıtinin aıtty.
Qorytyndylaı kelsek Býrabaı kýrortyna demalýǵa keletin týrısterdiń sany jyl sanap artýda, ótken jyly 850 myń týrıst kelse, bıyl bul kórsetkish taǵy 50 myńǵa artady dep kútilýde.