Aqmola ákimi Býrabaıdaǵy baǵalarǵa qatysty jaýap berdi

ASTANA. QazAqparat – Aqmola oblysynyń ákimi Ermek Marjyqpaev Býrabaı men Túrkııadaǵy demalysty salystyratyndarǵa jaýap berdi, dep habarlaıdy QazAqparat tilshisi.

«Býrabaıdaǵy demalys týraly aıtylǵanda odan Túrkııada demalý arzanyraq degen pikir bar. Infraqurylymǵa qatysty kóptegen shaǵym bar, dárethanalar men qoqystar máselesi belgili. Jańa týrıstik maýsymǵa qalaı daıyndalyp otyrsyzdar?», – dep suraq qoıdy tilshiler Ortalyq kommýnıkatsııalar qyzmetinde Aqmola oblysy ákiminiń brıfınginde.

Buryn Býrabaıǵa bir maýsymda 300-400 myń adam kelse, búginde kelýshiler sany mıllıonnan asady. Bıyl 1 mln 200 myń týrıst keledi dep boljap otyrmyz. Bul boıynsha arnaıy jumys tobyn qurdyq. Şýche-Býrabaı kýrorttyq aımaǵy – QR Prezıdenti Іs basqarmasynyń ulttyq parki ekenin bilesizder. Biz úlken syndarly jumys júrgizdik, myqtap daıyndaldyq. Jergilikti atqarýshy organ retinde qoqys tasıtyn kólikter aldyq, konteınerlik alańdar sany artty, 100-den astam qoqys jáshigi satyp alyndy. Sonymen qatar, kenttiń ózin tártipke keltiremiz, jolyn jóndep jatyrmyz. Mamyr-maýsym aılarynda joldaǵy barlyq jumystardy aıaqtaýǵa tyrysamyz

, - dep jaýap berdi E. Marjyqpaev.

Aımaq basshysy Býrabaıǵa demalýǵa keletin týrısterge de úndeý jasady.

Týrısterden tazalyq saqtaýdy, qoqys qaldyrmaýdy ótingim keledi. Buryn qoqys kúnine úsh ret jınalsa, qazir 6 ret jınaımyz. Qoqys esh jerden kelmeıdi, ony adamdar qaldyryp ketedi. Tazalyqpen aınalysatyn qyzmetkerlerimiz halyqtyń teris pikirlerin estýge májbúr bolady. Blogosfera da óte belsendi: barlyǵy kórgen-bilgenin jelige salyp otyrady. Ormanǵa óte muqııat bolý kerek, elimizde orman az. Ótken jyly órtterdiń shamamen 30% der kezinde baıqap, sóndire aldyq, tútin shyqsa dabyl qaǵatyn júıe ornattyq. Ormanǵa uqypty qaraýyńyzdy suraımyn

, - dedi Ermek Marjyqpaev.

Ákimniń aıtýynsha, ulttyq park aýmaǵynda ot jaǵýǵa bolatyn barbekıý aımaqtary ornatylady.

Osylaısha, jaǵdaıdy baqylaı alamyz. Sonymen qatar kóptegen sholý alańdary jasalady. Baǵaǵa kelsek, «Býrabaıdan Túrkııaǵa barǵan arzan» degen sóz erekshe ázilge aınaldy. Árıne, Býrabaıdaǵy Rixos, Wyndham Garden-ge kelseńiz, bul – halyqaralyq deńgeıdegi qonaq úıler, baǵasy da arzan emes. Biraq bizde 10 myń teńge, 30 myń teńge turatyn eki oryndyq úılerden bastap, kez kelgen sanatqa segmentter bar. Bul – básekelestik orta. Baǵany naryq anyqtaıdy

, - dedi Ermek Marjyqpaev.