Aqmol jáne Qarajar aýyldaryna tasqyn sýdan tóngen qaýip seıildi
Aqmola oblysy TJD baspasóz qyzmetiniń málimetinshe, 14 sáýirde Tselınograd aýdanynyń Aqmol jáne Qarajar eldi mekenderi arasynda ornalasqan ALVA lımandy sýarý júıesiniń bógeti tusynda qatty tolqynnyń saldarynan sý tolyp ketken.
Bógetti nyǵaıtýǵa TJD jeke quramy men jergilikti atqarýshy organ qyzmetkerleri, sondaı-aq Qarajar jáne Qaraótkel aýyldarynyń turǵyndary da kómektesip, sýdyń bógetten asyp, tasýyna jol berilmedi.
«Sáýirdiń 15-degi jaǵdaı boıynsha eldi mekenderge qaýip tónip turǵan joq. Qazirgi kezde ALVA lımandy sýarý júıesiniń bógetinde 60 adamnan turatyn Memlekettik kúzet qyzmeti otrıadynyń kúshimen bógettiń ishki bóligin qapshyqpen nyǵaıtý jumystary qolǵa alynǵan», - dedi Aqmola oblysy TJD bastyǵynyń orynbasary Erlan Moldahanov.
Aıta ketsek, budan buryn Jabaı ózenindegi sý deńgeıi jarty metrge tómendegenin jazǵan edik.