Ákimdikter statıstıkany jaqsartýda málimetterdi qubyltýy múmkin – Máýlen Áshimbaev

<p>ASTANA. KAZINFORM &ndash; Statıstıka obektıvti jáne senimdi bolýy kerek. Bul barlyq kórsetkishke qatysty másele. Onyń ishinde adamdardyń ómir súrý deńgeıine qatysty málimetter úshin asa mańyzdy. Osy jaıynda Senattyń jalpy otyrysynda palata tóraǵasy Máýlen Áshimbaev aıtty.</p>

«Tıimdi qadamdar jasap, qajetti zańdar qabyldaý úshin bizge oblystarda, óńirlerde ne bolyp jatqany jóninde obektıvti ári naqty derekter qajet. Qazirgi tańda negizgi statıstıkalyq málimetter jergilikti atqarýshy organdardyń qatysýymen jáne úılestirýimen qalyptasatyny belgili. Olar úshin bul, bir jaǵynan, joǵary turǵan qurylymdarǵa qandaı da bir esep berý ekeni túsinikti. Osy rette keı jaǵdaıda manıpýlıatsııaǵa jol beriletinin joqqa shyǵarýǵa bolmaıdy. Memleket basshysynyń tapsyrmasymen júzege asyrylatyn jumystar barynsha nátıjeli bolýy úshin ınflıatsııa, halyqtyń tabysy, ekonomıkalyq ósý, belgili bir salalar men óńirlerdegi jaǵdaı boıynsha obektıvti statıstıka qajet. Sol sebepti bul másele óte mańyzdy jáne zańǵa balamaly aqparat kózderi boıynsha normalardyń engizilýi durys tásil», – dedi M.Áshimbaev.

Osyǵan oraı Senat tóraǵasy jergilikti jerlerde statıstıkalyq málimetter qalaı qalyptasatynyn jáne balamaly aqparat kózderi qanshalyqty qoldanylatynyn qadaǵalaý úshin Statıstıka bıýrosymen birlesip, óńirlerde Senattyń salalyq komıtetiniń kóshpeli otyrysyn ótkizýdi usyndy. Sondaı-aq qazirgi tańdaǵy Big Data jáne basqa da derek kózderin qoldana otyryp, statıstıkalyq massıvti tıimdi taldaý tásilderin zerdeleýdiń mańyzdy ekeni sóz boldy.

Aıta keteıik, búgin Palata otyrysynda senatorlar «Qazaqstan Respýblıkasynyń keıbir zańnamalyq aktilerine memlekettik baqylaý men statıstıka, halyqty qorǵaý júıesin jetildirý, derekterdi basqarý, zańdy tulǵalardy tirkeý jáne artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» zańdy qarady.