Aqmaral Álnazarova balalardyń onkologııalyq aýrýlaryn emdeýdegi kúrdeli máselelerdi kóterdi
Onyń dereginshe, elimizdegi balalarǵa arnalǵan onkologııalyq ortalyqtarda patsıentterge oryn jetispeıdi. 130 tósekte bir ýaqytta 150 nemese odan da kóp balalar jáne balanyń zańdy ókilderi jatýy múmkin.
«Pedıatrııa ortalyǵynda patsıentter óliminiń negizgi sebebi hımıoterapııa kezeńderindegi septıkalyq asqyný bolyp qalyp otyr. Arnaıy tósektiń tapshy bolýy jáne kúndizgi statsıonardaǵy oryndardyń azdyǵy patsıentterdiń tym kóbeıip ketýine ákeledi jáne statsıonardaǵy epıdemıologııalyq jaǵdaıdy nasharlatady. Bul patsıentterdiń ımmýndyq júıesindegi qorǵanys kúshiniń múldem tapshylyǵy aıasynda qolaısyz bolyp otyr. Medıtsınalyq jeldetý júıesiniń, qabyrǵa men tóbelerdiń bakterııaǵa qarsy óńdeletin jabyndysynyń, zararsyzdandyrylǵan bakterııalyq bokstardyń bolmaýy jaǵdaıdy qıyndata túsýde», - dedi Aqmaral Álnazarova Senattyń jalpy otyrysynda.
Senator patsıentterdi tolyqqandy jáne sapaly emdeý úshin oryn jetispeýshiligi men medıtsınalyq jabdyqtardyń tozýyna baılanysty máselelerdi sheshý qajettigin atap ótti.
«Pedıatrııa ortalyǵynyń medıtsınalyq parkindegi jabdyqtardyń 70 paıyzy ábden tozǵan. MRT, kompıýterlik tomograf, ýltradybysty apparattar, qyzmet etý merzimi 25 jyldan asatyn rentgen qondyrǵysy tehnıkalyq jáne moraldyq turǵydan eskirgen. Pedıatrııa jáne balalar hırýrgııasy ǵylymı ortalyǵy janyndaǵy 200 tósektik balalar onkogematologııasynyń jeke korpýsyn salý úshin jobalyq-smetalyq qujat ázirleýge qarjy bólýdi jedeldetýdi suraımyn. Sondaı-aq elimizdegi jetekshi pedıatrııa ortalyǵynyń medıtsınalyq jabdyqtar parkin qosymsha jabdyqtaýǵa jáne jańartýǵa járdemdesý kerek», - dedi depýtat.