Aqkólde eki jolaýshynyń ómirin qıǵan kólik apaty boıynsha sot bastaldy

AQKÓL. QazAqparat – Aqmola oblysynyń Aqkól aýdanynda eki adamnyń ólimine sebep bolǵan kólik apaty boıynsha sot otyrysy ótip jatyr, dep habarlaıdy QazAqparat tilshisi.

Oqıǵa osydan bir jyl buryn bolǵan. Astana-Petropavl baǵytyndaǵy avtojoldyń 387-shaqyrymynda «Gazel» markaly evakýator jol jıeginde turǵan «MAN» júk kóligine soqtyǵysyp, saldarynan evakýatordyń ishindegi eki jolaýshy qaıtys bolǵan edi.

Tergeý jumystary jylǵa jýyq ýaqytqa sozyldy. Aıyptaýshy tarap «MAN» júk kóligi janarmaıy bite bastaǵan kezde joldyń bir bóligin ala toqtaǵanyn alǵa tartyp otyr.

Osylaısha júrgizýshi yqtımal jol-kólik oqıǵasynyń aldyn alý sharalaryn qabyldamaǵan dep esepteıdi.

ıAǵnı, ózge kólikterdiń tizginshileri jol boıynda kólik turǵanyn kóretindeı etip belgi qoımaǵan nemese kóliktiń «avarııalyq jaryǵyn» qospaǵan.

Onyń ústine júrgizýshi kóligin tastap, ózi Aqkól qalasyna ketip qalǵan.

Al evakýatordy tizgindegen júrgizýshi joldyń atalǵan bóliginde saǵatyna 90 shaqyrymdyq jyldamdyq mejesin saqtamaǵan dep aıyptalyp otyr. Oqıǵa ornynda tekserý júrgizgen kezde kóliktiń «tejelý izi» tabylmaǵan.

Osylaısha eki júrgizýshige QR Qylmystyq kodeksiniń 345-babynyń 4-bóligi boıynsha aıyp taǵylyp otyr.

Bul bap júrgizýshilerge abaısyzda eki nemese odan da kóp adamnyń ólimine sebep bolǵany úshin 5 jyldan 10 jylǵa deıin bas bostandyǵynan aıyrý jazasyn arqalatýy múmkin.

Sondaı-aq, kólik júrgizý quqyǵyn 7 jylǵa shekteıdi.

Búgingi otyrysta eki aıyptalýshy da kinásin moıyndaǵan joq. Atalǵan is boıynsha kelesi sot otyrysy 12 qarashaǵa josparlanǵan.