Ákimshilik quqyq buzýshylyqtardyń birinshi toqsandaǵy qorytyndysy jasaldy

ASTANA. QazAqparat - Qazaqstan Respýblıkasynyń ákimshilik quqyq buzýshylyqtar týraly jańa kodeksin qoldaný aıasynda 2016 jyldyń 1 toqsanynda elimizde 1 096 042 ákimshilik quqyq buzýshylyq tirkeldi, bul 2015 jyldyń sáıkes merzimine qaraǵanda 13,8 paıyzǵa artyq.

Bul týraly QR Bas prokýratýrasy Quqyqtyq statıstıka jáne arnaıy esepke alý jónindegi komıtetinen habarlandy.

Óndirý sharalary boıynsha osy jyly 221 541 quqyq buzýshyǵa qatysty shyǵarylǵan eskertýlerdiń sany 35 paıyzǵa, ákimshilik aıyppul salý týraly qaýly - 6,4 paıyzǵa artty, onda 786 655 quqyq buzýshy 13,9 mlrd. teńge somasyna tartylǵan.

Ákimshilik qamaýǵa tartylǵan adamdardyń 2 paıyzǵa tómendegeni baıqalady. Sonymen qatar sottar sheteldikterdi elden shyǵarý týraly ákimshilik sheshimdi 2,1 paıyzǵa az shyǵarǵan.

Barlyq salynǵan aıyppul somasynan 48,8% nemese 7,1 mlrd. teńge óndirildi. Sondaı-aq osy jyly quqyq buzýshylar 6,1 mlrd. teńgeden artyq somada ótken jyldardyń aıyppuldary boıynsha 15 myń qaýlyny oryndady. Jalpy ótken kezeń boıynsha ákimshilik aıyppuldardy óteý esebimen memleket bıýdjetine 13 mlrd. teńgeden artyq soma kelip tústi.

Óńirler boıynsha ákimshilik aıyppuldardyń eń kóp ótelýi - Shyǵys Qazaqstan (69%), Aqtóbe (66,4%) jáne Batys Qazaqstan (66%) oblystary boıynsha.