Ákimshilik kedergige tap bolǵan 22 myń kásipkerdiń máselesi sheshildi

ASTANA. QazAqparat - Jeti aıda Sybaılas jemqorlyqqa qarsy qyzmettiń usynymdary boıynsha 22 myńnan astam kásipkerdiń quqyǵyn qozǵaǵan bıznestiń 450-ge jýyq problemalyq keısteri sheshimin tapty, dep habarlaıdy QazAqparat.

Antıkor málimetinshe, jıi kezdesetin kedergilerdiń biri - ruqsat qujattaryn berý.

Aqmola oblysynda basseındik ınspektsııa arnaıy sý paıdalanýǵa ruqsatty uzartý úshin kásipkerden ekologııalyq saraptama qorytyndysyn usynýdy talap etken.

Memlekettik qyzmetti kórsetý qaǵıdalarynda mundaı qorytyndylar kózdelmegen.

Kásipker ótinishke sý alýdy esepke alý quraldarynyń bolýy týraly qujattyń elektrondy kóshirmesin ǵana qosa berýi tıis.

Sý paıdalanýǵa ruqsat berildi. Memlekettik qyzmetshilerdi jaýapkershilikke tartý boıynsha usynystar engizildi.

Bilim berý júıesin zerdeleý kezinde Sybaılas jemqorlyqqa qarsy qyzmet mektepte tamaqtandyrý qyzmetterin jetkizýshilerge qysym kórsetýdiń taǵy bir táýekelin anyqtady.

2022 jyldyń tamyz aıynan bastap bilim alýshylardy tamaqtandyrýdy uıymdastyrý qaǵıdalaryna mázir-ornalasýdy ázirleý jónindegi talap engizildi.

Alaıda, elorda ákimdigi bul normalardy elemegen.

20-ǵa jýyq konkýrs talap etiletin qujattarsyz ótkizilgen.

Sonymen qatar, ornalasý máziri balalardyń tamaqtaný sapasyn qamtamasyz etetin negizgi qujat bolyp tabylady.

Sybaılas jemqorlyqqa qarsy qyzmettiń usynysy boıynsha memlekettik aýdıt organdary konkýrstardyń kúshin joıyp, Bilim basqarmasy qajetti qujatty ázirleýdi bastady.

Sondaı-aq, «Bızneske jol» jobasy aıasynda jospardan tys tekserýlerdi taǵaıyndaý úshin memlekettik kirister organdary júrgizetin rettelmegen salyqtyq taldaýlar zerdelendi.

Engizilgen usynymdar boıynsha ýákiletti memlekettik organdar osyndaı taldaýlar júrgizý jáne jańa Salyq kodeksinde tekserýler taǵaıyndaý úshin negizdemelerdi bekitedi.

Bul jemqorlyq táýekelin tek júıeli deńgeıde ǵana emes, qalyptasý satysynda da alyp tastaýǵa múmkindik beredi.

Bul baǵyttaǵy jumys jalǵasyp jatyr.

Agenttiktiń departamentteri «sybaılas jemqorlyq táýekelderiniń kartalaryn» eskere otyryp, qazirgi ýaqytta bıznes quqyqtaryna nuqsan keltirýge ushyraǵan salalar boıynsha jemqorlyqqa qarsy monıtorıngter men jemqorlyq táýekelderine taldaý júrgizedi.

Sonymen qatar, kásipkerlerdiń máselesin jedel sheshý múmkindigi bar.

Ol úshin Facebook áleýmettik jelisi arqyly Sybaılas jemqorlyqqa qarsy qyzmettiń aýmaqtyq departamentteriniń basshylarymen baılanysý qajet.