Ákimdiktiń qala qurylysy keńesinde daýys berý quqyǵy joq – Erbolat Dosaev

ALMATY. QazAqparat- Almaty ákimi Erbolat Dosaev qala turǵyndarynyń qurylys jumystary josparlanǵan jer ýchaskelerin alyp qoıý týraly ótinishine qatysty pikir bildirdi, dep habarlaıdy QazAqparat tilshisi.

Bostandyq aýdany turǵyndarynyń biri Erbolat Dosaevqa Egizbaev, 9 mekenjaıyndaǵy jer ýchaskesi 15 jyl boıy maqsatsyz paıdalanylǵany týraly aıtty.

Onyń sózinshe, ákimdik 6,7 gektar jerdiń tek 4 gektaryn ǵana alyp qoıǵan.

«Qazir sol qalǵan jer ýchaskesinde bólshekteý jumystary júrip jatyr. Eger qurylys bastalatyn bolsa, kórshi úılerdiń turǵyndarymen kelisiledi me?»,- dep surady Bostandyq aýdanynyń turǵyny.

Erbolat Dosaevtyń aıtýynsha, ákimdik atalǵan mekenjaıdaǵy jer ýchaskesin múmkindiginshe satyp aldy.

«Biz tórt gektar jerdi múmkindiginshe satyp aldyq. Men búkil qala boıynsha ýchaskelerdi satyp ala almaımyn. Bul qomaqty qarajat. Kóppáterli turǵyn úı kesheniniń máselesimen qala qurylysy keńesi aınalysady, joba ázirge pysyqtalýda. Daıyn bolǵan kezde biz ony mindetti túrde kórsetemiz. Qazir qalada qala ákimi birde-bir qurylys jobasyn qaramaıdy-bul máselelermen qala qurylysy keńesi aınalysady. Ákimdiktiń onda daýys berý quqyǵy joq.

Ótken jyly, meniń bastamam boıynsha osy konsýltatıvtik-keńesshi organ qurylǵan kezde, biz birden qalanyń túrli áleýmettik toptarynyń ókilderi men sarapshylarynyń qala keńesine kirýdi kózdedik. Qala keńesiniń otyrystaryna shyǵarylatyn jobalardyń orta eseppen 70%-y kelisýden ótpeıdi jáne olardy ázirleýshilerge qaıtarylady dep aıta alamyn»,- dep jaýap berdi Erbolat Dosaev.