Ákimdiktermen qant qyzylshasyn ósirý kólemin ulǵaıtý boıynsha jumys júrip jatyr – mınıstrlik

NUR-SULTAN. QazAqparat – QR Aýyl sharýashylyǵy mınıstrligi jergilikti ákimdikterdiń turǵyndardy qantpen qamtý máselesine qatysty resmı túsinikteme berdi, dep habarlaıdy QazAqparat tilshisi.

«Qant baǵasyn arzandatý úshin jergilikti ákimdikter óńirlik áleýmettik-kásipkerlik korporatsııalar arqyly turaqtandyrý qoryndaǵy qant kólemin aldyn ala qalyptastyrý kerek edi. Alaıda, ol úshin ishki naryqta qant jetkilikti mólsherde bolýy kerek. Osy oraıda Reseıdiń qant eksportyna tyıym salýyna baılanysty problemalar týyndady. Tıisinshe ákimdikter qanttyń arzandaýyn qamtamasyz ete almady», - delingen QazAqparat tilshisi joldaǵan saýal jaýabynda.

Mınıstrliktiń resmı jaýabynda aıtylǵandaı, qazir elge kvota boıynsha bajsyz qant jetkizýge ruqsattyń berilýine baılanysty ákimdikter turaqtandyrý qoryn quryp jatyr.

«Oblys ákimdikteriniń derekteri boıynsha (19.08.2022 jylǵy jaǵdaıǵa sáıkes) respýblıkadaǵy qant qory 33,6 myń tonnany quraıdy. Sonymen qatar jergilikti ákimdiktermen kelesi jyly qant qyzylshasyn ósirý kólemin ulǵaıtý jáne qant zaýyttaryn otandyq shıkizatpen qamtamasyz etý boıynsha birlesken jumys júrgizilýde», - deıdi aýyl sharýashylyǵy mınıstrliginen.

Buǵan deıin habarlaǵanymyzdaı atalǵan vedomstvo kúzge qaraı elimizge qant jetkizý jaǵdaıy turaqtalyp, baǵanyń arzandaıtyndyǵyn boljap otyr.