Ákimdikterge jumysyn jańasha qurýǵa týra keledi – Talǵat Qalıev

ASTANA. QazAqparat – Memleket basshysy Qasym-Jomart Toqaevtyń tóraǵalyǵymen keshe ótken keńesten ákimder men memlekettik organ basshylary qandaı sabaq alýy tıis? Bul saýalǵa Qoldanbaly etnosaıası zertteýler ınstıtýtynyń basshysy Talǵat Qalıev jaýap berdi, dep habarlaıdy QazAqparat tilshisi.

«Eń aldymen, Májilis pen máslıhattardyń jańa quramynyń saılanýy jaǵdaıynda bıliktiń atqarýshy organdary ókilderiniń ózara qarym-qatynas paradıgmasy ózgeredi. Bul aıtarlyqtaı deńgeıde bıliktiń atqarýshy jáne jergilikti organdarynyń jumysyna, oblystarda bıýdjettik tártipke múldem basqa ádisti talap etedi. Oblystyq deńgeıde máslıhattardyń jartysy birmandattyq, al aýdandarda 100 paıyz birmandattyq bolatynyn eskersek, ınfraqurylym jobalaryna, eldi mekenderdi abattandyrý, jergilikti mańyzy bar jol salý máselesine qatysty talap kúsheıedi. Ákimdikter jumysyn múldem basqasha quryp, nátıjege baǵdarlanady dep oılaımyn. Muny Prezıdent te aıtyp otyr», - dedi Talǵat Qalıev QazAqparat tilshisine bergen suhbatynda.

Onyń paıymynsha, bir jaǵynan Memleket basshysy tarapynan, ekinshi jaǵynnan halyqtyń ókildi organdary, ıaǵnı depýtattar arqyly talaby kúsheıedi.

«Menińshe, ákimdikterge, mınıstrlikterge, Úkimetke jumys formatyn aıtarlyqtaı deńgeıde qaıta qarastyrýǵa týra keletin sııaqty», - dedi ınstıtýt basshysy.

Sonymen qatar ol Prezıdenttiń bir óńirge ǵana tanymal tulǵalarǵa eskertkish turǵyzýǵa qatysty synyna pikir bildirdi.

«Biz ýnıtarly memleketpiz. Bizde barlyǵyna ortaq ulttyq aýqymdaǵy batyrlar bolýy tıis. Bizge ulttyq aýqymdaǵy tulǵalar kerek. Barlyq jaǵynan biz shet aımaqtyq emes, birikktiretin, shoǵyrlatyndyratyn beınege baǵdarlanýymyz qajet», - dedi Talǵat Qalıev.