Ákimdikter veterınarlyq preparattardy saqtaýdyń tıisinshe sharttaryn shuǵyl qabyldaýy qajet - G.Isaeva

ASTANA. QazAqparat - Jergilikti atqarýshy organdar veterınarlyq preparattardy saqtaýdyń tıisinshe sharttaryn shuǵyl qabyldaýy qajet. Búgin Úkimettiń selektorlyq rejimdegi otyrysynda elimizdiń Aýyl sharýashylyǵy vıtse-mınıstri Gúlmıra Isaeva osylaı dep málimdedi.

Onyń atap ótýinshe, 2012-2013 jyldary óńirlerde veterınarlyq is-sharalardy oryndaý úshin 199 aýdandyq veterınarlyq stansa, 238 veterınarlyq pýnkt qurylyp, qazirgi ýaqytta olarda shamamen 12 myń veterınar jumys isteýde.

«Degenmen, búgingi kúni ákimdikter veterınarlyq stansalardyń 54 paıyzyn, veterınarlyq pýnktterdiń 74 paıyzyn jeke ǵımaratpen qamtamasyz etken joq. Ókinishke oraı, olar ǵımaratqa beıimdelgen oryndarǵa ornalastyryǵan nemese jalǵa alyp otyr, tipti ǵımaratpen qamtamasyz etilmegenderi de bar», - dedi ol.

Vıtse-mınıstrdiń aıtýynsha, ákimdikter árbir  veterınarlyq stansa men pýnktti eki kameraly tońazytqyshpen, termosyıymdylyqpen, termoshabadanmen jabdyqtaýy tıis. Ol úshin 2013-2014 jyldary 14,6 mlrd. teńge qarjy bólingen. Alaıda, áli kúnge deıin Batys Qazaqstanda veterınarlyq preparattar temperatýra rejimin  óreskel buzyp, saqtalýda. Al Atyraý, Jambyl jáne Qostanaı oblystarynda preparattar eshqandaı temperatýralyq baqylaýsyz saqtalyp otyr.

«Jergilikti atqarýshy organdar veterınarlyq preparattardy saqtaýdyń sharttaryn tıisinshe oryndaýdyń  shuǵyl arada qajetti sharalaryn qolǵa alýy tıis», - dep atap ótti G.Isaeva.