Ákimdikter kúndelikti jumystaryn «Rýhanı jańǵyrýǵa» jatqyza salady - Prezıdent

ASTANA. QazAqparat - Keıbir ákimdikter kúndelikti ózderiniń jumystaryn «Rýhanı jańǵyrýǵa» burmalap jatyr. Búgin Úkimettiń keńeıtilgen májilisinde Elbasy Nursultan Nazarbaev osylaı aıtty, dep habarlaıdy QazAqparat.

«Birqatar óńir «Rýhanı jańǵyrýǵa» qatysty jumystarymen tyńǵylyqty aınalysýda. Halyqtyń kópshiligi baǵdarlamany jaqsy qabyldaǵanyn bilemiz. Al keıbir ákimdikter kúndelikti ózderiniń jumystaryn «Rýhanı jańǵyrý» aıasynda atqaryp jatyrmyz dep jarııalaıdy. Mysaly, jyl saıynǵy merekelik jarystardy, festıvalderdi, sporttyq sharalardy «Rýhanı jańǵyrýǵa» jatqyza salady», - dep toqtaldy Prezıdent.

Osy oraıda Elbasy baǵdarlamaǵa qatysty bundaı málimdemeler taza burmalaý ekenin ári «Rýhanı jańǵyrýdyń» mártebesine nuqsan keltiretinin atap ótti.

«Sonda olardyń «Rýhanı jańǵyrý» ne ekenin túsinbegeni ǵoı?! Túkke turmaıtyn nysandardy qasıetti oryndar dep aıtýda. Oblys aýmaǵynan ne bolsa da nysan tap dep aıtqan joqpyz ǵoı. Bar nárseni aıtýymyz kerek», - dedi  N. Nazarbaev.

Elbasy degenmen óziniń múmkindikterin iske asyrmaı otyrǵan oblystar bar ekenin qadap aıtty. Bul turǵyda Soltústik Qazaqstan, Mańǵystaý, Pavlodar oblystarynda jumystardyń belsendi júrgizilýi kerektigin tapsyrdy.