Ákimdikter kompıýter satyp alýda bilim mınıstrligi qoıǵan talaptardy buzǵan
Jınalysta jergilikti atqarýshy organdardyń respýblıkalyq bıýdjet qarajaty esebinen kompıýterlik tehnıkany satyp alýy jáne tehnıkanyń jetkizilýi boıynsha máseleler qaraldy.
Rústem Bıǵarı Memleket basshysy qoıǵan mindet oryndalyp, birinshi qyrkúıekke deıin oqýshylarǵa qashyqtan oqý úshin qajet 500 myńǵa jýyq kompıýter jetkizilgenin atap ótti. Ákimdikter mektepterge kompıýterlik tehnıkany satyp alý boıynsha jumysty áli de jalǵastyryp jatyr. Alaıda, birqatar óńirde tehnıkany jetkizý merzimderi, lıtsenzııalyq qamtamasyz etý, kepildik berý jáne servıstik qyzmet kórsetýge baılanysty problemalar týyndady.
«Biz bul máselelerdi apparattyq jınalysta birneshe ret qarastyrdyq. Bul – memleket qarajaty. Árbir kompıýterlik tehnıkany satyp alý tikeleı sizderdiń moıyndaryńyzda. Ashyqtyqty tolyq qamtamasyz etý qajet. Árbir ákimdik aldymen kompıýterlik tehnıkany tekserip alǵan soń ǵana ony qabyldap, oqýshylarǵa jetkizýleri qajet. BǴM satyp alý protsesine qatyspaıdy. Úkimet ákimdikterge qajet qarajatty jedel berip, jaǵdaı jasady», – dep atap ótti bilim jáne ǵylym vıtse-mınıstri Rústem Bıǵarı.
Bilim alýshylardy qajetti aqparattyq resýrstar jáne kompıýterlik tehnıkamen qamtamasyz etýge bólingen qarajattyń ıgerilýi boıynsha sybaılas jemqorlyq kórinisterin baqylaý ári boldyrmaý maqsatynda «Adaldyq alańy» jobalyq keńsesiniń ókilderi men Sybaılas jemqorlyqqa qarsy is-qımyl agenttiginiń arnaıy monıtorıngtik toptarynyń músheleriniń qatysýymen monıtorıng júrgizý úshin 2020 jylǵy shilde aıynda BǴM Qazaqstan Respýblıkasy Sybaılas jemqorlyqqa qarsy is-qımyl agenttigine hat joldaǵanyn esterińizge sala keteıik.
«Iıa, buryn-sońdy tehnıkany osyndaı kólemde satyp alý bolǵan emes. Árıne, pandemııa men logıstıka máselelerine baılanysty kedergiler bolýy múmkin. Jetkizýshilerdiń mundaı syltaýlaryna qaramaı, olardan tıisti jumysty talap etýimiz kerek. Qolda bar barlyq mehanızmdi paıdalaný kerek edi. Kepildik qyzmet kórsetý, sapa bolýy kerek», – dedi bilim jáne ǵylym vıtse-mınıstri.