Ákimdikter kómirmen qamtamasyz etý jumystaryn talapqa saı júrgize almaı jatyr – QR IIDM

NUR-SULTAN. QazAqparat - Qazaqstan Respýblıkasynyń Indýstrııa jáne ınfraqurylymdyq damý mınıstrliginde «Ashyq saǵat alańy» jobasy sheńberinde aldaǵy jylytý maýsymyna daıyndyq máseleleri talqylandy, dep habarlaıdy QazAqparat mınıstrliktiń baspasóz qyzmetine silteme jasap.

Keńeske jergilikti atqarýshy organdar men bıznes ókilderi, kómir óndirýshi kásiporyndardyń mamandary qatysty.

QR IIDM Qara metallýrgııa jáne kómir ónerkásibi basqarmasynyń basshysy Janat Igisinovtiń aıtýynsha, aldaǵy jylytý maýsymyna daıyndyq naýryz aıynda bastalyp ketken.

Aıta keterligi, mınıstrlik oblystar men respýblıkalyq mańyzy bar qalalar bólinisinde 2022-2023 jyldarǵa arnalǵan kómir ónimderine qajettilik josparyn, sondaı-aq bıýdjettik uıymdar men halyq úshin kómirdi aldyn ala daıyndaýdy qarastyratyn Jol kartasyn ázirlegen bolatyn.

Spıkerdiń paıymdaýynsha, ákimdikter tarapynan kómirmen aldyn ala qamtamasyz etý boıynsha jumystar nashar júrgizilip jatyr. Osyǵan baılanysty jergilikti atqarýshy organdarǵa kómir daıyndaý jumystaryn aıaqtaý, sonymen birge kómir baǵasynyń zańsyz ósýine qatysty baqylaýdy kúsheıtý usynyldy. Budan basqa, halyq arasynda kómirdi satyp alý pýnkteri boıynsha túsindirý jumystary júrgizilýde.

Jalpy 2022 jyldyń 6 aıynyń qorytyndysy boıynsha elimizde 56 mln tonna kómir óndirilgen. Bul ótken jyldyń sáıkes kezeńimen salystyrǵanda 3,5 paıyzǵa artyq.

«Kezdesýdi qorytyndylaı kele, mınıstrlik ókili tapshylyqty boldyrmaý úshin kómir jetkizýshilermen belsendi ózara is-qımyl jasaý qajet ekendigine nazar aýdardy. QTJ ókilderine halyqtyń qajettilikterine kómir tasymaldaýǵa arnalǵan vagondardy basym negizde qamtamasyz etý usynyldy»,-delingen habarlamada.

Esterińizge sala keteıik, QR IIDM-de jan-jaqty talqylanǵan josparlar men sheshimderdi qabyldaý maqsatynda «Ashyq saǵat alańy» jobasy iske qosylǵan bolatyn. Dıalog alańy «Halyq únine qulaq asatyn memleket» tujyrymdamasyn iske asyrý úshin mınıstr Qaıyrbek Óskenbaevtyń bastamasymen quryldy.