Ákimdikter halyqty sýmen qamtý derekterin kartaǵa ýaqytyly engizýi qajet

NUR-SULTAN. QazAqparat – Ákimdikter halyqty sýmen qamtý derekterin Interaktıvti kartaǵa ýaqytyly engizýi qajet. Bul týraly búgin Úkimet otyrysynda Indýstrııa jáne ınfraqurylymdyq damý mınıstri Qaıyrbek Óskenbaev aıtty, dep habarlaıdy QazAqparat tilshisi.

«Biz aýyl turǵyndarynyń sýmen qamtamasyz etilý barysyna monıtorıng jasaý úshin Interaktıvti karta ázirledik. Atalǵan karta ǵalamtorda qoljetimdi jáne onda sýmen jabdyqtaý qyzmetterimen qamtamasyz etý, qarjylandyrý kólemi, halyq sany, tozý deńgeıi jáne basqa da ózekti aqparat kórsetilgen», - dedi mınıstr.

Onyń atap ótýinshe, halyqty sapaly aýyz sýmen qamtamasyz etý máselesi turaqty baqylaýda, jergilikti atqarýshy organdar Interaktıvti kartaǵa derekterdiń sapaly ári ýaqytyly engizilýin qamtamasyz etýi qajet.

«Halyqpen keri baılanys ornatý maqsatynda azamattardyń barlyq ótinishin qabyldaý men óńdeýge arnalǵan E-ótinish biryńǵaı platformasy arqyly kartaǵa qosymsha fýnktsııalardy qosý boıynsha is-sharalar qabyldandy», - dedi ol.