Ákimdik qyzmetkerleri jer zańnamasynyń normalaryn qate túsindiredi – Antıkor

ASTANA. QazAqparat – Ákimdik qyzmetkerleri jer zańnamasynyń normalaryn qate túsindiredi. Muny OKQ-de ótken brıfıngide Sybaılas jemqorlyqqa qarsy is-qımyl agenttiginiń Preventsııa qyzmetiniń basshysy Saıan Ahmetjanov aıtty, dep habarlaıdy QazAqparat tilshisi.

«Qazir barlyq óńirlerde ákimdikter jerdi jalǵa alý merzimin uzartý máselelerin jer komıssııalarynyń qaraýyna shyǵardy. Biraq bul talap zańmen qarastyrylmaǵan. Shyn máninde, bul protsedýra bıznes úshin jasandy kedergi.Munda ákimdik qyzmetkerleri qoldanystaǵy zańnamanyń normalaryn qate túsindiredi. Sondyqtan agenttik Jer resýrstaryn basqarý komıtetinen Jer kodeksiniń erejelerin resmı túsindirýdi surady. Bul túsiniktemeni biz barlyq ákimdikterge joldadyq jáne máseleni tolyǵymen japtyq», - dedi Preventsııa qyzmetiniń basshysy.

Sonymen birge Saıan Ahmetjanovtyń dereginshe, «Bızneske jol» jobasy aıasynda kásipkerlerdiń isine kedergi keltirgen 47 laýazymdy tulǵa jaýapqa tartyldy.

Buǵan qosa, óńirlerdegi bilim basqarmalarynyń qyzmetkerleri Kundelik.kz-ke mektep ashanasyndaǵy mázirdi ornalastyrǵany úshin kásipkerlerden aqsha alyp kelgen.