Ákimdik qyzmetkerleri baspana kezegindegi azamattardyń málimetin zańsyz túzetken

ASTANA. QazAqparat – Birqatar óńir ákimdikteriniń qyzmetkerleri baspana kezeginde turǵan azamattardyń málimetterin zańsyz túzetken. Bul týraly Májilis depýtattarynyń saýalyna QR Premer-Mınıstriniń birinshi orynbasary Roman Sklıardyń jaýabynda aıtylǵan, dep habarlaıdy QazAqparat tilshisi.

«Bıyl azamattar tarapynan túsken shaǵymdardyń negizinde Indýstrııa jáne ınfraqurylymdyq damý mınıstrligi ákimdik qyzmetkerleriniń kezekte turǵandardyń málimetterin zańsyz túzetý faktisimen tekserý júrgizdi. Onyń nátıjesinde Aqmola, Aqtóbe, Almaty, Atyraý, Jambyl, Qaraǵandy, Qostanaı, Qyzylorda, Pavlodar jáne Túrkistan oblystarynda zań buzshylyq faktileri anyqtaldy. Osyǵan oraı tıisti materıaldar ákimdik qyzmetkerleriniń is-áreketin qaraý jáne quqyqtyq baǵa berý úshin quqyq qorǵaý organdaryna jiberildi», - dep atap ótedi Úkimet basshysynyń birinshi orynbasary jaýabynda.

Onyń dereginshe, baspana kezegine qoıýdyń qoldanystaǵy tetigi ashyq emes. Osyǵan oraı «Qazaqstan Respýblıkasynyń turǵyn úı saıasatyn reformalaý máseleleri jónindegi keıbir zańnamalyq aktilerge ózgertýler men tolyqtyrýlar engizý týraly» zań jobasy ázirlendi. Ol Májilistiń qaraýynda jatyr.

«Zań jobasy aıasynda «Otbasy banki» AQ-ǵa baspanany esepke alý, qoıý jáne bólýdi bir ortalyqtan júzege asyratyn «ulttyq damý ınstıtýty» mártebesin berý kózdeledi. Sonymen qatar «Otbasy banki» AQ bazasynda Turǵyn úımen qamtamasyz etý ortalyǵy quryldy. Onda baspanaǵa muqtaj barlyq azamat qamtylady», - dedi Roman Sklıar.