Ákimdik qyzmetkeri memlekettik satyp alý rásimin zańsyz ótkizgen – ShQO
Sybaılas jemqorlyqqa qarsy is-qımyl agenttigi ShQO boıynsha departamentine «Bızneske jol» jobasy aıasynda Altaı aýdanynyń kásipkeri júgingen. Óz sózinde ol Oktıabr aýyldyq okrýgi ákimdiginiń avtokólik quraldaryn jóndeý boıynsha shart jasasýdan negizsiz bas tartqany jáne osy eldi mekende turatyn basqa kásipkerdiń múddelerine zańsyz qoldaý kórsetkendigin jetkizdi.
Anyqtalǵandaı, kásipkerdiń memlekettik satyp alý baıqaýyndaǵy ótinimi «baǵanyń sáıkes kelmeýi» sebebinen qabyldanbaǵan. Osylaısha, ákimdik QR Qarjy mınıstriniń 2015 jylǵy 11 jeltoqsandaǵy № 648 «Memlekettik satyp alýdy júzege asyrý qaǵıdalary» buıryǵynyń 450-tarmaǵynyń 2-bóliginiń talaptaryn buzǵan.
«Osy máselege baılanysty ShQO Sybaılas jemqorlyqqa qarsy qyzmeti óńirlik «Atameken» kásipkerler palatasymen birlesip, múddeli taraptarmen kezdesý ótkizdi. Nátıjesinde, ákimdik birinshi baıqaýdyń qorytyndysyn joıyp, baıqaýdy qaıta ótkizetin boldy. Kináli maman tártiptik jaýapkershilikke tartyldy», - dep habarlady departamenttiń baspasóz qyzmetinen.