Ákimderdiń sot otyrysyna qatyspaı-aq jeńiske jetetin kúni kelmeske ketti – Qanat Mýsın

NUR-SULTAN. QazAqparat – QR Joǵarǵy sotynyń Ákimshilik ister jónindegi sot alqasynyń tóraǵasy Qanat Mýsın «Habar» telearnasyndaǵy «Ult múddesi» baǵdarlamasynda Ákimshilik rásimdik-protsestik kodekstiń qabyldaýynan qandaı nátıje kútýge bolatynyn atady, dep habarlaıdy QazAqparat tilshisi.

«Ákimshilik rásimdik-protsessýaldyq kodeks qabyldanǵanǵa deıin memlekettik organdar bul protseske kelmeı-aq, sottardy jeńip shyǵýy múmkin edi. Al qazir sotta jeńiske jetý úshin terleýine týra keledi. Biz ákimderdiń talap-aryzdaryna taldaý júrgizdik. Aıta ketý kerek, kodeks qabyldanýyna baılanysty ákimder 53% jaǵdaıda jeńilis tapqan. Sheneýnik óz sheshiminiń durystyǵyn sotta dáleldeý kezinde qosalqy negizdemelerdi ýáj retinde usyna almaıdy. Sol úshin árbir sheshimin on ret ólshep, bir kesý arqyly qabyldaıdy. Bul – ákimshilik kodekstiń jaǵymdy áseriniń biri», - dep túsindirdi Qanat Mýsın.

Joǵarǵy sot ókiliniń aıtýynsha, burynǵy TMD elderiniń ishinde Qazaqstan Ákimshilik kodeksti sońǵylardyń biri bolyp qabyldaǵan.

«Qoldanystaǵy kodeks sheteldik sýdıalardyń qatysýymen 10 jyl boıy ázirlendi. Biz germanııalyq modeldi tańdadyq. Osy 10 jyl bizge basqa elderdiń jibergen qatelikterin eskerýge múmkindik berdi. Búgingi tańda sheteldik zań qaýymdastyǵy bizdiń kodeksimizge joǵary baǵa berip otyr», - dedi ol.