Ákimderdiń halyqpen kezdesýinde daıyn suraqtar qoıylmaýy kerek
«Aldyn ala daıyndalǵan adamdardyń ákimderge suraq qoıýyna eshqandaı da jol berýge bolmaıdy. Aýdıtorııany qadalaǵan kezde ákimdikke jaqyn, ákimdiktiń sózin sóıleıtin adamdardy emes «kelemin», «qatysamyn» degen belsendi adamdardyń kezdesýge kelip qatysýyna bolady. Kez kelgen esepti bolsyn, turaqty bolsyn kezdesýge kelip qatysamyn degen adamǵa eshkim shekteý qoıa almaıdy. Ókinishke oraı beıresmı shekteýlerdiń bolǵany ras. Biraq, aldaǵy ýaqytta jergilikti atqarýshy bılikpen bul máseleni sheshemiz. Ony Ulttyq ekonomıka mınıstrligi ǵana emes Prezıdent ákimshiligi de jiti qadaǵalap otyrady», - dedi vıtse-mınıstr «Habar-24» telearnasyndaǵy «Suhbat» baǵdarlamasynda.
Onyń atap ótýinshe, jergilikti jerlerde mundaı shekteýler bolǵan jaǵdaıda zań aıasynda tıisti is-shara qabyldanady.
Sonymen qatar ol ákimderdiń azamattardy jeke qabyldaý kúnderin ulǵaıtý máselesi de qaralǵanyn aıtty.
«Ákimniń kezdesýi ótkennen keıin ol azamattardy jeke qabyldaýy tıis. Jeke qabyldaýǵa kim qatysa alady? Sol jıynǵa kelgen kezde saýal joldaýǵa ýaqyty jetpegen, qoıǵan suraǵyna tıisti jaýap ala almaǵan adamdar jeke qabyldaýǵa kire alady. Ol jerde tek ákim ǵana emes, jergilik atqarýshy bıliktiń ókilderi, prokýratýra, ishki ister organdarynyń qyzmetkerleri, máslıhat depýtattary, qoǵamdyq keńes músheleri, zııaly qaýym ókilderi kóterilgen máseleni der ýaqyty sheshýge tyrysady», - dedi Baýyrjan Omarbekov.